پی ایس ایل پر کورونا کے وار جاری ہیں جبکہ فرنچائز پشاور زلمی کی ٹیم کورونا وائرس سے زیادہ متاثر دکھائی دے رہی ہے۔

پی ایس ایل کے انعقاد میں صرف 2 دن باقی ہیں جبکہ اس سے قبل ہی ایونٹ پر کورونا کے وار جاری ہیں۔

پشاور زلمی کے کپتان سمیت اہم کھلاڑی کورونا وائرس کا شکار ہوگئے ہیں جبکہ گذشتہ روز پی سی بی نے پشاور زلمی کے 2 کھلاڑیوں کے کورونا ٹیسٹ مثبت آنے کی تصدیق کی تھی جس میں کامران اکمل اور ارشد اقبال شامل تھے۔

تاہم اب میڈیا رپورٹس کے مطابق پشاور زلمی کے کپتان وہاب ریاض اور حیدر علی کا بھی کورونا ٹیسٹ مثبت آگیا ہے۔

واضح رہے کہ اس سے قبل پشاور زلمی کے کپتان وہاب ریاض کا کہنا تھا کہ کورونا وبا کے دوران پی ایس ایل 7 کا انعقاد ایک چیلنج ہے، ایونٹ میں ہماری ٹیم پشاور زلمی مضبوط ہے اور بھرپور جدوجہد کریں گے جب کہ سپر لیگ کے مقابلے سخت اور دلچسپ متوقع ہیں۔

پشاور زلمی کے کپتان کا مزید کہنا تھا کہ آخری وقت میں اسکواڈ میں زیادہ تبدیلیاں کافی چیلنجنگ ہیں، بطور ٹیم ہمارا فوکس صرف جیت پر ہے، ماضی میں فتح کے قریب پہنچ کر ٹرافی نہ جیت سکے، اس سال جیت کے لیے بہت پر امید ہیں۔

دوسری جانب آسٹریلیا سے تعلق رکھنے والے بین کٹنگ پی ایس ایل 7 کے لیے کراچی پہنچ گئے جبکہ وہ پی ایس ایل 7 میں پشاور زلمی کی نمائندگی کریں گے۔ ان کا کہنا تھا کہ پی ایس ایل میں پشاور زلمی کی نمائندگی کرنے کے لیے پرجوش ہوں۔

یاد رہے کہ پی ایس ایل 7 کا آغاز 27 جنوری سے کراچی میں ہورہا ہے جس کا پہلا مرحلہ 7 فروری تک جاری رہے جبکہ ابتدائی میچ کراچی کنگز اور ملتان سلطانز کی ٹیموں کے درمیان کھیلا جائے گا۔

ایونٹ کا دوسرا مرحلہ 10 فروری سے لاہور کے قذافی اسٹیڈیم میں شروع ہوگا جو 27 فروری تک جاری رہے گا۔