ہارون رشید کا دورہ آسٹریلیا کے حوالے سے کہنا ہے کہ کھلاڑیوں میں مختصر وقت کے دوران مختلف فارمیٹس کو اپنانے کی صلاحیت ہونی چاہیے۔

پاکستان کرکٹ ٹیم کے سابق چیف سلیکٹر اور ہیڈ کوچ ہارون رشید کا کہنا ہے کہ پاکستانی پلیئرز کو پی ایس ایل کے تین سے چار دنوں بعد آسٹریلیا کے خلاف کارکردگی دکھانے میں کوئی مسئلہ نہیں ہونا چاہیے۔

انہوں نے کہا کہ آسٹریلیا کے ساتھ سیریز میں اتنے کم دنوں کی وجہ سے یقیناً فرق کھلاڑیوں کی کارکردگی پر پڑے گا لیکن ان کے بقول آسٹریلیا کی ٹیم بھی تو سری لنکا سے ایک روزہ سیریز کھیل کر آرہی ہے۔

ہارون رشید نے کہا کہ اب یہی کرنا ہوتا ہے کہ کبھی وائٹ بال سے کرکٹ کھیلی جائے اور اس کے فوراً بعد ریڈ بال سے کھیلی جائے، یقیناً پی سی بی نے بھی اس حوالے سے ضرور سوچا ہوگا۔

سابق چیف سلیکٹر نے کہا کہ پلیئرز میں مختصر وقت کے دوران مختلف فارمیٹس کو اپنانے کی صلاحیت ہونی چاہیے۔

ان کا کہنا تھا کہ یہ بھی دیکھنا ہوگا کہ پی ایس ایل کے فائنل میں پہنچنے والی دو ٹیموں میں کتنے ایسے کھلاڑی شامل ہوں گے جو کہ پاکستانی ٹیسٹ اسکواڈ کا حصہ بنیں گے اور ان کے بقول ایسی صورت میں بہت سے کھلاڑیوں کو آرام کا موقع مل جائے گا۔

ہارون رشید کا کہنا تھا کہ ان کے نزدیک موجودہ صورت حال میں سب سے بڑا مسئلہ بائیو سیکیور ببل کا ہونا چاہیے کہ پی ایس ایل سے فارغ ہونے کے بعد پاکستانی پلیئرز بائیو سیکیور ببل کی پابندی کیسے کریں گے؟

یہ بھی پڑھیں: شاہین شاہ آفریدی آسٹریلیا کیخلاف شاندار کارکردگی کیلئے پرعزم

علاوہ ازیں انہوں نے کہا کہ دو ممالک کے درمیان ہونے والی سیریز کا انعقاد دستیاب تاریخوں کے حساب سے ہی کیا جاتا ہے کیونکہ اگلے پانچ سالوں کے لیے میچز کی تاریخیں طے کر دی جاتی ہیں۔

ہارون رشید کا مزید کہنا تھا کہ یہ دیکھنے کی ضرورت ہے کہ اس وقت آسٹریلیا، انگلینڈ اور نیوزی لینڈ کی ٹیمیں پاکستان کا دورہ کر رہی ہیں اور پاکستان کے لیے یہی اچھا ہے۔

واضح رہے کہ پاکستان ٹیم کے سابق کپتان اور ہیڈ کوچ مصباح الحق نے بھی پی ایس ایل کے فوری بعد آسٹریلیا کے خلاف ہوم سیریز میں ٹیم کی پرفارمنس متاثر ہونے کا خدشہ ظاہر کیا تھا۔

 انہوں نے کہا تھا کہ پی ایس ایل فائنل کے بعد پاکستانی ٹیم کے پاس بہت کم وقت بچے گا جس کی وجہ سے آسٹریلیا کے خلاف پاکستانی پلیئرز کی کارکردگی متاثر ہو سکتی ہے۔