لاہور : آسٹریلیا کی کرکٹ ٹیم 24 برس کے بعد تاریخی دورہ پاکستان کرنے جارہی ہے۔

ذرائع کے مطابق پاکستان کرکٹ بورڈ (پی سی بی) نے آسٹریلیا کے دورے کو یادگار بنانے کے لئے منصوبہ بندی شروع کردی ہے جبکہ ٹیسٹ سیریز کے تین وینیوز پر اہم شخصیات کو مدعو کیا جائے گا۔

ذرائع کے مطابق ٹیسٹ سیریز کی اہمیت کو اجاگر کرنے کے لئے اعلی حکومتی شخصیات کو بھی مدعو کی جائے گا اور 24 برس پہلے آسٹریلیا کے خلاف ہوم سیریز کھیلنے والے کرکٹرز کو بھی بلایا جائے گا۔

ذرائع کا کہنا ہے کہ سابق کرکٹرز کو راولپنڈی، کراچی اور لاہور کے ٹیسٹ میچز میں بلایا جائے گا  اور تاریخی دورے کے حوالے سے پاکستان کرکٹ بورڈ جلد بلڈ اپ مہم شروع کرے گا۔

ذرائع کا مزید کہنا ہے کہ پاکستان سپر لیگ (پی ایس ایل) کی وجہ سے تاحال زور و شور سے یہ مہم شروع نہیں کی جاسکی ہے۔

یہ بھی پڑھیں: پاک آسٹریلیا سیریز، حریف کو زیر کرنے کی منصوبہ بندی خفیہ رکھنے کا فیصلہ

واضح رہے کہ 24 برس بعد 27 فروری کو مہمان ٹیم پاکستان آرہی ہے، اس دورے میں 4 تا 8 مارچ پہلا ٹیسٹ راولپنڈی میں کھیلا جائے گا اور دوسرا ٹیسٹ 12 تا 16 مارچ کراچی میں ہوگا۔

ٹیسٹ سیریز کا تیسرا اور آخری میچ 21 مارچ تا 25 مارچ تک لاہور میں کھیلے جانا ہے۔

اسی طرح ون ڈے سیریز کا پہلا میچ 29 مارچ، دوسرا 31 مارچ اور تیسرا 2 اپریل کو کھیلا جائے، ون ڈے سیریز کے تمام میچز راولپنڈی میں کھیلے جائیں گے۔

آسٹریلیا کے دورہ پاکستان کے دوران ٹیسٹ و ونڈے سیریز کے بعد ایک ٹی ٹوئنٹی میچ بھی کھیلا جانا ہے جو 5 اپریل کو راولپنڈی میں ہی کھیلا جائے گا۔