لاہور: جنوبی افریقی کھلاڑی عمران طاہر کا ہمشکل فین ان سے ملنے اسٹیڈیم پہنچ گیا۔

پاکستان سپر لیگ (پی ایس ایل) سیزن 7 کے میچز لاہور کے قذافی اسٹیڈیم میں جاری ہیں جس کا 25 واں میچ ملتان سلطانز اور کوئٹہ گلیڈی ایٹرز کی ٹیموں کے درمیان کھیلا جارہا ہے۔

اس میچ کے دوران ملتان سلطانز کے جنوبی افریقی کھلاڑی عمران طاہر کا ہمشکل بلال طاہر ان سے ملاقات کرنے کے لیے قذافی اسٹیڈیم پہنچ گیا ہے۔

عمران طاہر کا ہمشکل بلال طاہر ہو بہو ان کی طرح دکھتا ہے، جسے دیکھ کر یقیناً آپ بھی پریشانی میں مبتلا ہوگئے ہوں گے۔

ہمشکل بلال طاہر کا کہنا ہے کہ میں 13 سال سے عمران طاہر سے ملاقات کی کوشش کررہا ہوں، مجھے اللہ تعالی نے ہی ایسا بنایا ہے۔

ان کا کہنا تھا کہ میری شکل عمران طاہر سے ملتی ہے اور میں جہاں سے بھی گزرتا ہوں تو لوگ مجھے کہتے ہیں کہ ’عمران طاہر گزر رہا ہے‘۔

ہمشکل کا کہنا تھا کہ میں کرکٹ میں سیلیبریشن بھی عمران طاہر کی طرح کرتا ہوں، ملتان سلطانز بہت اچھا کھیل رہی ہے انشااللہ اس بار جیت ملتان کی ہی ہوگی۔