قومی کرکٹ ٹیم کے کپتان بابر اعظم انٹرنیشنل کرکٹ کے تمام فارمیٹس میں سنچری بنانے والے تیسرے کپتان بن گئے۔

تفصیلات کے مطابق بابر اعظم نے یہ اعزاز کراچی ٹیسٹ میں آسٹریلیا کے خلاف 196 رنز کی شاندار اننگ کھیل کر اپنے نام کیا۔

بابر اعظم اس سے قبل ون ڈے اور ٹی ٹوئنٹی انٹرنیشنل  میچ میں بھی  بطور کپتان سنچری بناچکے ہیں۔وہ یہ کارنامہ انجام دینے والے پہلے پاکستانی جبکہ مجموعی طور پر تیسرے کھلاڑی ہیں۔

ان سے قبل سری لنکا کے سابق کپتان تلکارتنے دلشان اور جنوبی افریقا کے سابق کپتان فاف ڈوپلیسی یہ کارنامہ انجام دے چکے ہیں۔

خیال رہے کہ کراچی ٹیسٹ میں بابر اعظم 4  رنز کی کمی سے اپنی پہلی ٹیسٹ ڈبل سنچری اسکور نہ کرسکے تاہم انہوں نے ٹیم کو یقینی شکست سے بچاکر میچ ڈرا کروادیا۔

انہیں شاندار بلے بازی کرنے پر میچ کا بہترین کھلاڑی قرار دیا گیا۔