لاہور: آسٹریلوی آل راؤنڈر مچل مارش انجری کا شکار ہوگئے ہیں جس کی وجہ سے ان کی سیریز میں شرکت غیر یقینی نظر آرہی ہے۔

آسٹریلین کرکٹ ٹیم کو وائٹ بال سیریز سے قبل بڑا جھٹکا لگا ہے کیونکہ ان کی ٹیم کے اہم کھلاڑی اور آل راؤنڈر مچل مارش انجری کا شکار ہوگئے ہیں۔

انجری کے باعث ان کی سیریز میں شرکت غیر یقینی نظر آرہی ہے جبکہ آسٹریلوی کپتان ایرن فنچ نے مچل مارش کی انجری کو غیر معمولی قرار دیا ہے۔

آسٹریلین کرکٹ ٹیم کے کپتان کا کہنا ہے کہ مچل مارش فٹنس مسائل سے دو چار ہیں، آج صبح ان کا اسکین کرایا گیا ہے،‏ اسکین کے بعد دیکھیں گے کہ وہ سیریز کے لیے دستیاب ہیں یا نہیں۔

آسٹریلوی آل راؤنڈر میچل مارش کو فیلڈنگ ڈرلز کے دوران انجری کا سامنا کرنا پڑا ہے۔

یاد رہے کہ اس سے قبل آسٹریلوی کھلاڑی اسٹیو امتھ بھی انجری کا شکار ہوگئے ہیں جس کی وجہ سے وہ وائٹ بال سیریز سے باہر ہوگئے ہیں۔

ترجمان کرکٹ آسٹریلیا کے مطابق تیسرے ٹیسٹ میچ میں اسمتھ کو کہنی میں درد محسوس ہوا تھا جبکہ اسٹیو اسمتھ کی جگہ لیگ اسپنر مچل سوئپسن کو ٹیم میں شامل کرلیا گیا ہے۔

واضح رہے کہ پاکستان اور آسٹریلیا کے درمیان وائٹ بال سیریز کا آغاز 29 مارچ سے ہونے جارہا ہے، وائٹ بال میچز میں 3 ون ڈے پر مشتمل سیریز اور ایک ٹی ٹوئنٹی میچ کھیلا جائے گا۔

پہلا ون ڈے 29 مارچ کو کھیلا جائے گا اور دوسرا 31 مارچ کو جبکہ تیسرا اورآخری ون ڈے 2 اپریل کو کھیلا جانا ہے۔

دونوں ٹیموں کے درمیان واحد ٹی ٹوئنٹی میچ 5 اپریل کو ہوگا جبکہ وائٹ بال کے تمام میچز لاہور کے قذافی اسٹیڈیم میں کھیلے جائیں گے۔