سابق وزیر اعظم عمران خان کے جانے کے بعد پاکستان کرکٹ بورڈ میں بھی تبدیلیوں کا امکان ظاہر کیا جارہا ہے۔

نجی خبر رساں ادارے نے ذرائع سے رپورٹ دی ہے کہ پاکستان کرکٹ بورڈ کے چیئرمین رمیز راجہ نے بھی عہدے سے الگ ہونے کا ذہن بنالیا ہے جس کے لیے انہوں نے اپنے قریبی دوستوں سے مشاورت مکمل کرلی ہے۔

رپورٹ میں انکشاف کیا گیا ہے کہ چیئرمین پی سی بی آئی سی سی کے اجلاس میں شرکت کے بعد عہدے سے علیحدگی کا اعلان کرسکتے ہیں۔

رپورٹ میں کہا گیا ہے کہ اگلے ہفتے سے پی سی بی میں اعلی سطح پر بڑی تبدیلیوں کا قوی امکان ہے جبکہ رمیز راجہ کے دور میں لگائے گئے افراد کا مستقبل بھی روشن نظر نہیں آرہا ہے۔

واضح رہے کہ چیئرمین پی سی بی رمیز راجہ ان دنوں سی ای او اور ڈائریکٹر انٹرنیشنل کے ہمراہ دبئی میں موجود ہیں جہاں آج آئی سی سی میٹنگز کا آج آخری روز ہے۔

خیال رہے کہ پاکستان کے سابق وزیر اعظم عمران خان کے خلاگ گذشتہ روز قومی اسمبلی میں تحریک عدم اعتماد کامیاب ہوگئی تی جس کے بعد انہیں واپس گھر بھیج دیا گیا ہے۔

یہ بھی پڑھیں: عمران خان تحریک عدم اعتماد سے گھر جانے والے پہلے وزیراعظم بن گئے

دوسری جانب آج وزارت عظمی کے لیے اپوزیشن جماعتوں کے متفقہ امیدوارشہباز شریف نے اپنے کاغذت نامزدگی جمع کروادیے ہیں جس کے بعد اب قومی اسمبلی نئے قائد ایوان کا انتخاب کرے گی۔