ٹی 20 فارمیٹ میں شاہینوں کا پلڑا کینگروز پر بھاری ہے جبکہ پاکستان ٹیم کو 12 میچز میں کامیابی حاصل ہوئی ہے۔

لاہور کے قذافی اسٹیڈیم میں آج رات ساڑھے 8 بجے پاکستان اور آسٹریلیا کی کرکٹ ٹیمیں واحد ٹی ٹوئنٹی میچ میں مدمقابل ہوں گی۔

پاک آسٹریلیا ٹی ٹوئنٹی میچ سے قبل ایک نظر دونوں ٹیموں کے درمیان ہونے والے ٹی ٹوئنٹی میچز پر ڈالتے ہیں جس میں پاکستان کا پلڑا بھاری دکھائی دیتا ہے۔

مجموعی طور پر پاکستان کو نتائج میں برتری حاصل ہے جبکہ دونوں ٹیمیں اب تک 22 میچز میں مدمقابل آچکی ہیں جس میں 12 میچز پاکستان کامیاب رہا ہے جبکہ ایک میچ برابر اور ایک میچ بے نتیجہ رہا ہے۔

آج ہونے والے میچ میں کینگروز کی ٹیم اپنے اسٹار کھلاڑیوں سے محروم ہے جبکہ آسٹریلیا کی ٹیم میں پاکستان کو ورلڈ کپ میں شکست دینے والی ٹیم کے صرف کھلاڑی شریک ہورہے ہیں۔

آسٹریلوی ٹیم کے کپتان فنچ بھی ان دنوں فارم میں دکھائی نہیں دے رہے ہیں اور گذشتہ دو میچز میں ان کی پرفارمنس انتہائی مایوس کن رہی ہے۔

آسٹریلیا کے عبوری ہیڈ کوچ اینڈریو میکڈونلڈ نے اس میچ میں بابر اعظم کو خطرناک قرار دیتے ہوئے کہا ہے کہ پاکستان ہمیشہ اپنے ہوم گراؤنڈ پر حاوی رہا ہے۔

انہوں نے کہا ہے کہ بابر نے ون ڈے سیریز میں ناقابل یقین حد تک اچھی کارکردگی کا مظاہرہ کر کے ہمیں واقعی مشکل میں ڈال دیا ہے۔

دوسری جانب پاکستان ٹیم اپنے فل فارم میں نظر آرہی ہے جبکہ ان کے اسکواڈ میں قومی ٹیم کے کپتان بابر اعظم اور اوپنر امام الحق بھی موجود ہیں۔

ان دونوں کھلاڑیوں نے پاکستان ٹیم کو ون ڈے سیریز جیتنے میں کافی مدد کی ہے جبکہ بابر اعظم نے ون ڈے سیریز میں 276 رنز اورامام الحق نے 298 رنز بنائے تھے۔

پاکستان کو ایک طرف ہام گراؤنڈ کا فائدہ حاصل ہے تو وہیں پاکستان کا بولنگ اٹیک بھی کافی مضبوط ہے جس میں شاہین شاہ آفریدی، حسن علی ، شاہنواز دھانی اور حارث رؤف جیسے بولرز موجود ہیں۔