پاکستان ہاکی ٹیم دورہ یورپ میں کل بیلجیئم سے میچ کھیلے گی۔

ایشیا کپ کی تیاری کے لیے یورپ جانے والی پاکستان ہاکی ٹیم کل بیلجیئم کے مدمقابل ہوگی جبکہ اس سے قبل پاکستان ٹیم نے ہالینڈ سے دو میچز کھیلے ہیں۔

مینجمنٹ کا کہنا ہے کہ دورہ یورپ سے نوجوان کھلاڑیوں کو بین الاقوامی میچز کا تجربہ حاصل ہوگا جس کی وجہ سے ہمیں ایشیا کپ سے قبل اچھا کمبی نیشن بنانے کا بھی موقع مل جائے گا۔

واضح رہے کہ پاکستان ہاکی ٹیم نے ہالینڈ کے خلاف دو میچز پر مشتمل سیریز کھیلی تھی جو ایک ایک سے برابر رہی تھی۔

پہلا میچ پاکستان ٹیم کے نام رہا تھا جس میں پاکستان نے 3 گول کے مقابلے میں 5 گول سے کامیابی حاصل کی تھی جبکہ دوسرے میچ میں ہالینڈ نے 1 گول کے مقابلے میں 4 گول سے کامیابی سمیٹی تھی۔

خیال رہے کہ ورلڈ کپ کے پیش نظر ہالینڈ کی ٹیم نے پاکستان کے خلاف میچز میں نوجوان کھلاڑیوں کو موقع دیا تھا جبکہ پاکستان ٹیم میں بھی 7 کھلاڑیوں کو ڈیبیو کیا گیا تھا۔