مینز ہاکی ہیرو ایشیاء کپ 2022 کا شیڈول جاری ہوگیا ہے، ایشیاء کپ کا آغاز 23 مئی سے انڈونیشیا کے شہر جکارتہ میں ہوگا۔

انڈونیشیا کے شہر جکارتہ میں 23 مئی 2022 تا یکم جون 2022 تک ہونے والے ہیرو ایشیاء کپ کے میچز کے شیڈول کا اعلان ہوگیا ہے۔

ایونٹ میں ٹیموں کو دو پولز میں تقسیم کیا گیا، پول اے میں بھارت، جاپان، پاکستان اور انڈونیشیا شامل ہیں جبکہ پول بی میں ملائیشیا، کوریا، عمان اور بنگلا دیش کو شامل کیا گیا ہے۔

پاکستان اپنا پہلا میچ 23 مئی کو روایتی حریف بھارت کے ساتھ کھیلے گا جبکہ پاکستان کا دوسرا میچ 24 مئی کو انڈونیشیا کیساتھ اور تیسرا میچ 26 مئی کو جاپان کیساتھ کھیلے گا۔

اس ایونٹ میں جیتنے والی ٹیم کو ایشیاء کا چیمپئن قرار دیا جائے گا جبکہ جیتنے والی ٹیم ایف آئی ایچ ہاکی ورلڈ کپ کے لیے بھی کوالیفائی کرے گی۔

واضح رہے کہ بھارت دفاع چیمپئن ہے جس نے 2017 میں کامیابی حاصل کی تھی جبکہ جنوبی کوریا سب سے زیادہ 4 مرتبہ ٹائٹل اپنے نام کرچکا ہے۔

علاوہ ازیں پاکستان اوربھارت تین تین مرتبہ اس ایونٹ کے فاتح رہ چکے ہیں۔