سابق آسٹریلوی کرکٹر اینڈریو سائمنڈ کی کار ٹریفک حادثے کا شکار ہوئی جس کے باعث ان کا انتقال ہوگیا ہے۔

غیر ملکی خبر رساں ادارے کے مطابق 46 سالہ سابق آسٹریلوی کرکٹر اینڈریو سائمنڈ سینیچر کی رات حادثے کا شکار ہوئے جبکہ ان کی گاڑی تیز رفتاری کے باعث الٹ گئی تھی۔

ان کی ہلاکت پر کئی نامور کھلاڑیوں نے افسوس کا اظہار کیا ہے، رات گئے ٹوئٹ میں سابق آسٹریلوی کرکٹر جیسن گلیپسے نے ان کی تصویر شیئر کرتے ہوئے کہا کہ ’ایک خوفناک خبر، ہم آپ کو بہت مس کریں گے‘۔

پاکستان کے سابق فاسٹ بولر شعیب اختر نے ان کی تصویر شیئر کرتے ہوئے لکھا کہ ’وہ بہت غمگین ہیں، ہمارے درمیان میدان میں اور میدان کے باہر بھی بہت اچھا تعلق تھا، ان کے خاندان سے تعزیت کا اظہار کرتا ہوں‘۔

Devastated to hear about Andrew Symonds passing away in a car crash in Australia. We shared a great relationship on & off the field. Thoughts & prayers with the family. #AndrewSymonds pic.twitter.com/QMZMCwLdZs

— Shoaib Akhtar (@shoaib100mph) May 14, 2022

واضح رہے کہ اینڈریو سائمنڈز نے 1998 میں پاکستان کے خلاف اپنا پہلا انٹرنیشنل ون ڈے میچ کھیلا تھا جبکہ انہوں نے اپنے کیریئر میں 26 ٹیسٹ اور 198 ون ڈے میچز کھیلے۔

ان کا شمار جارحانہ بلے بازوں اور اچھے بولروں میں ہوتا تھا جبکہ وہ اپنی اچھی فیلڈنگ کے باعث بھی خاصی مشہور تھے۔

برطانیہ کے شہر برمنگھم میں پیدا ہونے والے اینڈریو سائمنڈز نے اسکول کے دنوں میں ہی کرکٹ کھیلنا شروع کردی تھی جبکہ انہوں نے اپنے کیریئر کا آغاز 1993/94 میں کلب کرکٹ کھیل کر کیا تھا۔

انہوں نے انگلینڈ کاؤنٹی کرکٹر کلبز کے علاوہ لنکا شائر اور سرے کی سے بھی کاؤنٹی کرکٹ کھیلی تھی جبکہ انہیں کاؤنٹی میں سب سے زیادہ چھکے مارنے کا ریکارڈ بھی حاصل تھا جو پچھلے ہفتے ہی بین اسٹوکس نے توڑا ہے۔

خیال رہے کہ اس واقعے کو شین وارن کے انتقال کے بعد اسپورٹس کے لیے بڑا دھچکا قرار دیا جارہا ہے جبکہ لوگ اس واقعے پر افسوس کا اظہار بھی کررہے ہیں۔