قومی ٹیم کے کپتان بابر اعظم نے آئی سی سی سے کووڈ 19 کے بعد کی صورت حال کا ازسر نو جائزہ لینے کی درخواست کردی ہے۔

نجی خبر رساں ادارے سے گفتگو میں قومی کرکٹ ٹیم کے کپتان بابر اعظم کا کہنا تھا کہ کووڈ 19 کے دوران بولرز نے چیلنجنگ صورت حال کا سامنا کیا ہے۔

بابر اعظم نے کہا کہ بولرز کو سب سے زیادہ کریڈٹ جاتا ہے کیونکہ انہوں نے اپنے حق میں قوانین نہ ہونے کے باوجود صورت حال کا سامنا کیا ہے۔

ان کا کہنا تھا کہ بولرز کو گیند کو چمکانے کے لیے تھوک کی ضرورت پڑتی ہے جس سے گیند سوئنگ ہوتی ہے لیکن وہ تھوک نہیں لگاسکتے تھے جبکہ پسینے سے گیند اس طرح نہیں چکمتی جس طرح تھوک سے چمکتی ہے۔

کپتان نے کہا کہ اب چونکہ کووڈ 19 کی صورت حال پہلے سے بہتر ہے تو کووڈ کی وجہ سے بنائی جانے والی پالیسیز کا ازسر نو جائزہ لینا ضروری ہے۔

بابر اعظم کا کہنا تھا کہ ہر ملک نے کووڈ کے حوالے سے الگ پالیسی بنارکھی تھی، جیسے نیوزی لینڈ میں 14 دن کا قرنطینہ تھا جبکہ ویسٹ انڈیز میں ایک ہفتے کا اور انگلینڈ میں پانچ دن کا۔

انہوں نے مزید کہا کہ ہمیں ان پالیسیز کو فالو کرنا پڑتا تھا جس کی وجہ سے ہر ملک میں ایک نیا چیلنج ہوا کرتا تھا۔