ویسٹ انڈیز کے خلاف ہوم سیریز کے لیے تیاریاں مکمل ہوگئی ہیں جس کے بعد پاکستان ٹیم آج لاہور سے ملتان پہنچ رہی ہے۔

ویسٹ انڈیز کے خلاف ہوم سیریز کھیلنے کے لیے قومی ٹیم آج بذریعہ بس ملتان پہنچے گی جبکہ قومی ٹیم بابر اعظم کی قیادت میں آج تقریباً شام 5 بجے تک ملتان پہنچ جائے گی۔

قومی ٹیم آج ملتان پہنچ کر آرام کرے گی اور کل سے ملتان اسٹیڈیم میں شام 4 بجے سے پریکٹس سیشن کا آغاز ہوگا۔

ویسٹ انڈیز کی ٹیم کل صبح اسلام آباد پہنچے گی اور پھر چارٹرڈ طیارے سے ملتان آئے گی۔

ٹیموں کی آمد و رفت کے پیش نظر ملتان شہر میں سیکیورٹی کو ہائی الرٹ کرنے کی تیاریاں مکمل کرلی گئی ہیں۔

واضح رہے کہ ویسٹ انڈیز کے دورہ پاکستان کے دوران دونوں ٹیموں کے درمیان تین ون ڈے میچز کھیلے جائیں گے جس کا پہلا میچ 8 جون، دوسرا 10 جون اور تیسرا 12 جون کو ملتان میں کھیلا جائے گا۔

دوسری جانب پاکستان اور ویسٹ انڈیز کے درمیان ملتان میں ہونے والی ون ڈے سیریز میں پی سی بی نے شائقین کے لئے سستے ٹکٹس کا اعلان کر دیا ہے۔

پی سی بی نے ٹکٹوں کی قیمت 300 روپے سے 500 روپے تک رکھنے کا فیصلہ کیا ہے جبکہ پی سی بی کا ٹکٹوں کو سستے کرنے کا مقصد شائقین اپنے سپر اسٹارز کو آئندہ تین آئی سی سی مینز کرکٹ ورلڈ کپ سپر لیگ ون ڈے انٹرنیشنل کے دوران ایکشن میں دیکھنا ہے۔