پاکستان اور ویسٹ انڈیز کے درمیان ون ڈے سیریز کے کامیاب انعقاد کے بعد چیئرمین پی سی بی رمیز راجہ نے شائقین، ٹیم انتظامیہ، گراؤنڈ اسٹاف اور تمام سیکیورٹی اہلکاروں کی تعریف کی ہے۔

سیریز کے بعد تقریب سے خطاب کرتے ہوئے چیئرمین پی سی بی رمیز راجہ خاص طور پر ان شائقین کا شکریہ ادا کرتے رہے جنہوں نے ملتان کی شدید گرمی کے باوجود شرکت کی۔

یہ بھی پڑھیں: بابر اعظم ملتانی شائقین کے جذبے سے متاثر

ان کا کہنا تھا کہ ’میں شائقین کا شکریہ ادا کرنا چاہوں گا کہ جنہوں نے گرم موسم کے باوجود اسٹیڈیم کا رخ کیا اور ہمارا ساتھ دیا۔

چیئرمین پی سی بی نے کہا کہ ملتان کا کراؤڈ یہ ثابت کرچکا ہے کہ ملتان بہت زیادہ کرکٹ کا مستحق ہے اور ہم پاکستان اور انگلینڈ کے میچز کو ملتان میں کرانے اور پی ایس ایل کے میچز کو بھی یہاں منتقل کرنے کی پوری کوشش کریں گے۔

یہ بھی پڑھیں: جعلی ٹکٹ پر شائقین کا ملتان اسٹیڈیم میں میچ دیکھنے کا انکشاف

چیئرمین پی سی بی نے مشکل موسم کے باوجود اپنی بہترین صلاحیتوں کے ساتھ حصہ لینے پر دونوں ٹیموں کا شکریہ ادا بھی کیا۔

انہوں نے کہا کہ میں ویسٹ انڈیز اور پاکستان کی کرکٹ ٹیموں کا شکریہ ادا کرنا چاہوں گا کہ انہوں نے گرم موسم کے باوجود زبردست کھیل کا مظاہرہ کیا۔

ویسٹ انڈیز کے کھلاڑیوں نے بھی شائقین کی تعریف کی جبکہ قومی ٹیم کے کپتان بھی ملتانی شائقین کی تعریف کیے بنا نہ رہ سکے تھے۔

یاد رہے کہ ملتان اسٹیڈیم میں پاکستان اور ویسٹ انڈیز کی ٹیمیں ون ڈے سیریز میں مدمقابل تھیں جس میں پاکستان نے کالی آندھی کو کلین سوئپ کیا ہے۔