کاشف علی کو کاؤنٹی کرکٹ 2024 کے سیزن کے اختتام تک ووسٹر شائر کے ساتھ دو سال کے معاہدے میں توسیع مل گئی ہے۔

کشمیر میں پیدا ہونے والے کاشف علی ساؤتھ ایشین کرکٹ اکیڈمی کے پہلے کھلاڑی ہیں جنہوں نے فرسٹ کلاس کاؤنٹی کے ساتھ معاہدہ کیا ہے۔

انہوں نے سیکنڈز میں رنز کا پہاڑ کھڑا کردیا تھا جبکہ انہوں نے پچھلی 7 اننگز میں 700 سے بھی زائد رنز اسکور کیے ہیں، کاشف علی نے کاؤنٹی چیمپئن شپ میں ڈربی شائر کے خلاف اپنے ڈیبیو پر نصف سنچری بھی اسکور کی تھی۔

ان کی شاندار پرفارمنس کے باعث انہیں ووسٹر شائر کی جانب سے دو سال کے معاہدے سے نوازا گیا ہے جبکہ انہوں نے ٹی ٹوئنٹی بلاسٹ کے ساتھ ساتھ وائٹ بال کرکٹ میں بھی شاندار کارکردگی کا مظاہرہ دکھایا ہے۔

ووسٹر شائر کرکٹ اسٹیئرنگ گروپ کے چیئرمین پال پرجیون نے بھی گریم ہیک پویلین میں آج ممبرز فورم میں کاشف کے لیے نئے معاہدے کی تصدیق کی ہے۔

ان کا کہنا تھا کہ کاشف علی نے سیکنڈز میں شاندار کاکردگی کا مظاہرہ کیا ہے جبکہ ہم نے دیکھا کہ ریڈ بال کے ساتھ ساتھ وائٹ بال کرکٹ میں بھی اس سے بہتر کھلاڑی کون ہوسکتا ہے۔

اس موقع پر کاشف علی کا کہنا تھا کہ مجھے موقع دینے پر میں ووسٹر شائر کا شکر گزار ہوں اور میں طویل معاہدہ حاصل کرنے کے لیے اپنی کوششیں جاری رکھوں گا۔

انہوں نے کہا کہ مجھے خوشی ہے کہ کلب نے اب مجھے دو سال کا نیا معاہدہ دیا ہے، پیشہ ورانہ کرکٹ کھیلنا وہ چیز ہے جس کا میں نے کھیل شروع کرنے کے بعد سے ہی خواب دیکھا تھا۔

ان کا کہنا تھا کہ میں امید کرتا ہوں کہ کلب نے مجھ پر جو اعتماد دکھایا میں اس کا بدلہ چکا سکوں جبکہ میں خود کو بہتر بنانے اور زیادہ سے زیادہ رنز بنانے پر اپنی توجہ مرکوز رکھوں گا۔

انہوں نے مزید کہا کہ میں سیکنڈز میں اپنی فارم سے بہت خوش ہوں، فرسٹ کلاس ڈیبیو میں نصف سنچری اسکور کرنا خوش کن تھا، امید ہے کہ میں ووسٹر شائر کے لیے بہت سی اچھی پرفارمنس دے سکوں۔