انگلینڈ کے خلاف ون ڈے سیریز جیتنے کے بعد بھارت کی رینکنگ میں اضافہ ہوگیا ہے۔

آئی سی سی نے ون ڈے ٹیم رینکنگ جاری کی ہے جس میں نیوزی لینڈ کا پہلا نمبر برقرار ہے جبکہ انگلینڈ کی ٹیم رینکنگ میں دوسرے نمبر پر موجود ہے۔

بھارت انگلینڈ کے خلاف سیریز جیتنے کے بعد تیسرے نمبر پر موجود ہے جبکہ پاکستان اور بھارت کے درمیان صرف تین رینکنگ پوائنٹس کا فرق رہ گیا ہے۔

پاکستان ٹیم 106 پوائنٹس کے ساتھ چوتھے نمبر پر ہے جبکہ بھارت کے رینکنگ پوائنٹس 109 ہیں۔

علاوہ ازیں آسٹریلیا کا رینکنگ میں پانچواں، ساؤتھ افریقہ کا چھٹا اور بنگلہ دیش کا ساتواں نمبر ہے جبکہ سری لنکا آٹھویں، ویسٹ انڈیز نویں اور افغانستان دسویں نمبر پر موجود ہے۔

واضح رہے کہ منگل کو اوول میں ہونے والے پہلے ون ڈے میچ میں بھارت نے انگلینڈ کو شکست دے کر پاکستان کو رینکنگ میں پچھے دھکیل دیا تھا۔

 یاد رہے کہ پاکستان نے گذشتہ ماہ ویسٹ انڈیز کو کلین سوئپ کرنے کے بعد بھارت کو رینکنگ میں چوتھے نمبر پر دھکیل دیا تھا تاہم پاکستان ٹیم زیادہ دیر تیسرے نمبر پر نہیں رہ سکی۔