بلے باز احمد شہزاد کا ایک سوال کے جواب میں کہنا تھا کہ اگر مجھ پر فلم بنائی جاتی ہے تو ہالی وڈ اسٹار بریٹ پٹ اس میں میرا کردار ادا کریں۔

پاکستان کرکٹ ٹیم کے مایہ ناز بلے باز احمد شہزاد نے حال ہی میں ایک نجی ٹی وی چینل کے اسپورٹس شو میں شرکت کی جس میں ان سے سوال و جواب پوچھے گئے۔

اسی دوران اینکر نے ان سے سوال پوچھا کہ اگر آپ پر کوئی فلم بنتی ہے تو اس میں آپ کس اداکار کو اپنے روپ میں دیکھنا چاہیں گے۔

سوال کے جواب میں احمد شہزاد کا کہنا تھا کہ اگر مجھ پر فلم بنے تو میں چاہتا ہوں کہ ہالی وڈ اسٹار بریڈ پٹ میرا کردار ادا کریں۔

انہوں نے یہ بھی دعویٰ کیا کہ پی سی بی کے سابق چیئرمین نجم سیٹھی نے 2015 کے ورلڈ کپ کے بعد انہیں پاکستان کرکٹ ٹیم کی کپتانی کی پیشکش کی تھی۔

واضح رہے کہ احمد شہزاد حال ہی میں خبروں کی سرخیوں میں رہے ہیں جب انہوں نے پاکستان کے سابق کپتان اور ہیڈکوچ وقار ہونس پر منفی رپورٹ کے ذریعے ان کا کیریئر برباد کرنے کا الزام عائد کیا تھا۔

ان کا کہنا تھا کہ میں چاہتا ہوں کہ رپورٹ کو پبلک کیا جائے جس کی بنیاد پر مجھے ٹیم سے باہر رکھا ہوا ہے، میں نے کبھی کچھ غلط نہیں کیا۔

انہوں نے کہا تھا کہ میرے پاس بھی اپنے دفاع کے لئے بہت کچھ ہے۔ اگر میں نے کچھ غلط کیا ہے تو مجھے اس کا بتایا جائے سزا دی جائے لیکن میرے کیرئیر کے ساتھ کھیلا جا رہا ہے۔

یاد رہے کہ احمد شہزاد نے پاکستان کے لیے 13 ٹیسٹ، 81 ون ڈے اور 59 ٹی ٹوئنٹی میچز کھیلے ہیں جس میں انہوں نے 5 ہزار سے زائد رنز اسکور کیے ہیں۔

علاوہ ازیں انہوں نے 10 سنچریاں اور 25 نصف سنچریاں بھی اسکور کی ہیں۔