لاہور: پاکستان ہاکی ٹیم کے سابق نائب کپتان علی شان نے مالی مشکلات کی وجہ سے ہاکی کو خیر باد کہہ دیا۔

پاکستان ہاکی ٹیم کے نائب کپتان علی شان نے کہا ہے کہ میری آٹھ ماہ سے تنخواہ نہیں آئی گھر چلانا مشکل ہوگیا ہے، مالی حالات کی پریشانی کے باعث ہاکی سے بریک لیا ہے۔

قومی کھلاڑی علی شان نے لاہور میں میڈیا سے گفتگو کرتے ہوئے کہا کہ گزشتہ حکومت نے ڈیپارٹمنٹس بند کر دئیے تھے جس کے باعث حالات بگڑنا شروع ہوگئے، میں پی ایچ ایف سے آرام کا کہا تھا تاکہ اس دوران فیملی کے لئے کچھ کر سکوں۔

ہاکی کے قومی کھلاڑی علی شان نے کہا کہ میری سوئی سدرن میں جاب تھی دیگر کھلاڑیوں کے لئے بہت مشکل ہو چکا ہے، سیکریٹری اسپورٹس اینڈ یوتھ افئیرز نے مجھے بلایا تھا میرے لئےاعزازئیے کا اعلان کیا ہے، مجھے خوشی ہے کہ اعزازئیے کا اعلان ہوا لیکن میرے جیسے اور بھی کھلاڑی ہیں۔

کھلاڑی علی شان کا کہنا تھا کہ میں نے ٹریننگ جاری رکھی ہوئی ہے میں ایک پروفیشنل کھلاڑی ہوں، ملک کے لئے کھیلنا خواب ہوتا ہے یہ اعزاز ہے لیکن آپ نے اپنی فیملی کو بھی لے کر چلنا ہے۔

علی شان نے کہا کہ کھلاڑی کو گھر چلانے کے لئے پیسہ چاہئے جوکہ اس وقت نہیں ہے، بریک کے بعد جب بھی ہاکی ٹیم کو میری ضرورت ہوئی میں کھیلوں گا۔

ہاکی کھللاڑی علی شان کا مزید کہنا تھا کہ میری اس وقت توجہ اپنے مسائل حل کرنے پر ہے وہ جب حل ہوں گے تو ضرور کھیلوں گا اور میری حکومت سے اپیل ہے کہ ڈیپارٹمنٹس بحال کریں اور نوجوان ہاکی کھیلنا نہ چھوڑیں۔