لاہور: پاکستان کرکٹ ٹیم کے مایہ ناز فاسٹ بولر شاہین شاہ آفریدی ایشیا کپ اور انگلینڈ کے خلاف ہوم سیریز سے باہر ہوگئے ہیں۔

تفصیلات کے مطابق پاکستان کرکٹ ٹیم کے فاسٹ بولر شاہین شاہ آفریدی کو ڈاکٹرز نے چار سے چھ ہفتے آرام کا مشورہ دیا ہے۔

پی سی بی میڈیکل ایڈوائزری کمیٹی اور انڈی پینڈنٹ اسپیشلسٹ نے تازہ ترین اسکینز اور رپورٹس کی روشنی میں آرام تجویز کیا ہے جس کے بعد فاسٹ بولر اے سی سی ٹی ٹوئنٹی ایشیاکپ اور انگلینڈ کے خلاف ہوم سیریز سے باہر ہوگئے ہیں۔

ممکنہ طور پر شاہین شاہ آفریدی کی نیوزی لینڈ میں اکتوبر میں ہونے والی سہہ فریقی ٹی ٹوئنٹی سیریز کے لیے کرکٹ میں واپسی ہوگی۔

واضح رہے کہ شاہین شاہ آفریدی گال میں سری لنکا کے خلاف پہلے ٹیسٹ میں دائیں گھٹنے کی تکلیف کا شکار ہوئے تھے۔

پی سی بی کے چیف میڈیکل آفیسر ڈاکٹر نجیب اللہ سومرو کا کہنا ہے کہ شاہین شاہ سے بات کی ہے اور وہ یہ خبر سن کر پریشان ہیں۔

ڈاکٹر نجیب اللہ سومرو کہتے ہیں کہ وہ ایک بہادر نوجوان ہیں، وہ جلد بھرپور انداز سے کرکٹ میں واپس آئیں گے اور ملک کی نمائندگی کریں گے۔

 انہوں نے کہا کہ شاہین شاہ آفریدی نے روٹرڈیم میں ری ہیب کے دوران بہتری دکھائی ہے، اس کے باوجود انہیں مزید بہتری کے لئے کچھ وقت درکار ہے۔

خیال رہے کہ اے سی سی ٹی ٹوئنٹی ایشیاکپ کے لئے شاہین آفریدی کے متبادل کا اعلان جلد کردیا جائے گا جب کہ پاکستان کرکٹ ٹیم پیرکو روٹرڈیم سے دبئی روانہ ہوگی۔