پاکستان کرکٹ ٹیم 28 اگست کو ٹی ٹوئنٹی ایشیاکپ کے گروپ میچز میں روایتی حریف بھارت کے مدمقابل ہوگی۔

پاکستان اور بھارت کے درمیان ہونے والے پچھلے میچ میں پاکستان کرکٹ ٹیم نے کامیابی اپنے نام کی تھی جس کی وجہ سے روایتی حریف بھارت پر دباؤ ہوگا۔

تاہم بھارت کے پاس جسپریت بمراہ اور محمد شامی جیسے بولرموجود ہیں جو پیش گوئیوں کو غلط ثابت کرسکتے ہیں۔

شائقین کو اس مقابلے کا بے صبری سے انتظار ہے جس میں دونوں ممالک کی عوام کے جذبات مختلف ہوتے ہیں اور کوئی بھی اپنی ٹیم کو ہارتا ہوا دیکھنا نہیں چاہتا۔

ایسے وقت میں سابق بھارتی کرکٹر ہربھجن سنگھ نے اپنے کھیل کے دنوں کی مثبت یادیں بیان کی ہیں۔

انہوں نے انکشاف کیا کہ ان کی پاکستان کے سابق اسپنر شقلین مشتاق سے دوستی ہے جب کہ انہوں نے بتایا کہ وہ دونوں کرکٹ سمیت آف اسپن بولنگ کے فن پر بات کیا کرتے تھے۔

ہربھجن سنگھ نے کہا کہ میں ان سے کرکٹ پر بحث کیا کرتا تھا، مجھے 1999 میں دہلی میں ہونے والا ٹیسٹ میچ یاد ہے جس میں انیل بھائی نے 10 وکٹیں حاصل کیں تھیں۔

انہوں نے کہا کہ میں بھی اس میچ میں کھیل رہا تھا، یہ واحد موقع تھا جب میں نے سکون محسوس کیا تھا کیونکہ مجھے وکٹ نہیں ملی تھی۔

ہربھجن سنگھ نے اس میچ کو یاد کرتے ہوئے کہا کہ جب انیل بھائی نے 6،7 وکٹیں لے لیں تو مجھے امید ہوگئی تھی کہ اب مجھے کوئی وکٹ نہیں ملے گی اور انہیں ہی تمام وکٹیں حاصل کرنی چاہیے۔

ہربھجن نے مزید انکشاف کیا کہ وہ پاکستان کے سابق کپتان شاہد آفریدی کے بھی اچھے دوست ہیں اور وہ ان کے لیے پاکستان سے خصوصی تحائف بھی لاتے تھے۔

انہوں نے کہا کہ پاکستان ٹیم میں میرے بہت سے ایسے دوست بھی تھے جو میرے لیے پنجابی ڈرامے اور پشاوری چپلیں لایا کرتے تھے۔

ہربھجن سنگھ کے بیانات یہ ظاہر کرتے ہیں کہ پاک بھارت مقابلے میں دشمنی اور نفرت کے علاوہ اور بھی بہت کچھ ہے۔ امید ہے کہ شائقین بھی اس سے کچھ سیکھیں گے اور ایک دوسرے کے ساتھ اس احترام کے ساتھ پیش آئیں گے جس کا انسان مستحق ہے۔