بین الاقوامی اولمپک کمیٹی نے کرکٹ کو لاس اینجلس 2028 اولمپک گیمز میں شارٹ لسٹ کر لیا ہے جس کے بعد ان گیمز میں کرکٹ کی شمولیت کے امکان میں اضافہ ہو گیا ہے۔

مقامی میڈیا کی رپورٹ کے مطابق اولمپک ایونٹ میں کرکٹ کا مقابلہ آٹھ دیگر کھیلوں کے ساتھ ہوگا جس میں بیس بال/سافٹ بال، فلیگ فٹ بال، لیکروس، بریک ڈانسنگ، کراٹے، کک باکسنگ، اسکواش اور موٹرسپورٹ شامل ہیں۔

انٹرنیشنل کرکٹ کونسل کی جانب سے پریزنٹیشن کی صحیح تاریخ ابھی طے نہیں کی گئی ہے، لیکن ایونٹ میں گیم کی شمولیت کے بارے میں حتمی فیصلہ 2023 کے نصف آخر میں متوقع ہے، جب ممبئی میں آئی او سی کی میٹنگ شیڈول ہے۔

واضح رہے کہ اولمپک میں کھیلوں کی تعداد کی کوئی حد نہیں ہے لیکن انہیں شامل کرنے کے لیے درج ذیل معیار کی فہرست کو پورا کرنا ضروری ہے۔

کھیلوں کی میزبانی کی لاگت اور پیچیدگی میں کمی کو ترجیح دینا۔

بہترین اتھلیٹس اور کھیلوں کو شامل کرنا جو اتھلیٹ کی صحت اور حفاظت کو اولیت دیتے ہیں۔

دنیا بھر کے شائقین کی عالمی اپیل کو تسلیم کرنا، اور میزبان ملک کی دلچسپی۔

نئے شائقین اور کھلاڑیوں کو شامل کرنے کے لیے صنفی مساوات اور نوجوانوں کی مطابقت کو ترجیح دینا۔

صاف ستھرا کھیلوں کی حمایت کے لیے دیانتداری اور انصاف پسندی کو برقرار رکھنا۔

طویل مدتی پائیداری کو فروغ دینے کے لیے ماحولیاتی پائیداری کی حمایت کرنا۔

آئی سی سی کو اولمپکس میں کھیل کی شمولیت پر یقین ہے کیونکہ جاری برمنگھم کامن ویلتھ گیمز 2022 میں خواتین کے کرکٹ مقابلوں کی مقبولیت میں اضافہ نظر آیا ہے۔

آئی سی سی چیف ایلار ڈائس کا کہنا تھا کہ ہم نے کامن ویلتھ گیمز سے دیکھا ہے کہ دنیا کے بہترین کھلاڑیوں نے بڑے ہجوم کے سامنے کھیلنے میں کتنا لطف اٹھایا ہے اور مجھے یقین ہے کہ ٹی وی پر بھی ناظرین کی بڑی تعداد نے کرکٹ کو دیکھا ہو گا۔

واضح رہے کہ گزشتہ ہفتے ایلار ڈائس نے کہا تھا کہ ہم نے اولمپک گیمز میں شامل ہونے کی اپنی خواہش کا اظہار کیا ہے، اور کرکٹ کی لاس اینجلس اولمپک گیمز میں شامل کرنے کے لیے منتظمین کے ساتھ ہر ممکن تعاون کر رہے ہیں۔

ایلار ڈائس نے مزید کہا کہ ملٹی اسپورٹس گیمز میں ہونا، چاہے وہ کامن ویلتھ گیمز ہوں یا ایشین گیمز یا افریقی گیمز، کرکٹ کو ان ملٹی سپورٹس ایونٹس میں شامل کرنا ہمارے کھیل کی ترقی کے لیے اچھا ہے۔

انہوں نے مزید کہا کہ یہ ہمارے بہت سے ممبر ممالک کو حوصلہ دیتا ہے اور یہ امید کرتے ہیں کہ ان گیمز کی کوریج کے ذریعے کرکٹ کا کھیل نئے سامعین تک پہنچے جو روایتی کرکٹ کے نابلد ہیں۔