انگلینڈ کے خلاف ہوم سیریز میں 315 رنز بناکر محمد رضوان ایک سیریز میں سب سے زیادہ رنز بنانے والے کھلاڑی بن گئے ہیں۔

پاکستان اور انگلینڈ کی ٹیموں کے درمیان 7 ٹی ٹوئنٹی میچز پر مشتمل سیریز جاری ہے جس کے چار میچز کراچی اور ایک میچ لاہور میں کھیلا گیا۔

پانچ میچز میں سے 3 میں کامیابی حاصل کرکے پاکستان نے سیریز میں برتری حاصل کرلی ہے جب کہ گذشتہ روز کھیلے گئے میچ میں پاکستان نے سنسنی خیز مقابلے کے بعد 5 رنز سے کامیابی حاصل کی تھی۔

انگلینڈ کے خلاف سیریز میں محمد رضوان سب سے زیادہ اسکور کرنے والے کھلاڑی ہیں، انہوں نے 5 میچز میں 315 رنز اسکور کیے ہیں۔

اسی کے ساتھ ہی محمد رضوان ایک سیریز میں 300 سے زیادہ رنز بنانے والے پہلے بیٹر بھی بن گئے ہیں جب کہ اس سے قبل یہ اعزاز سربیا کے لیزل ڈنبر کے پاس تھا۔

انہوں نے سربیا کی جانب سے کھیلتے ہوئے بلغاریہ کے خلاف چار اننگز میں 284 رنز اسکور کیے تھے۔ علاوہ ازیں جنوبی افریقہ کے کوئنٹن ڈی کوک ویسٹ انڈیز کے خلاف 5 اننگز میں 255 رنز اسکور کرچکے ہیں۔

واضح رہے کہ انگلینڈ کے خلاف سیریز میں محمد رضوان نے 4 نصف سنچریاں اسکور کی ہیں اور اب بھی مزید 2 میچز ہونے باقی ہیں۔

پاکستان کی جانب سے اس سے قبل یہ اعزاز کپتان بابر اعظم کے پاس تھا، جو 2021 میں جنوبی افریقہ کے خلاف چار اننگز میں 210 رنز اسکور کرچکے ہیں۔