افغان بولر سے جھڑپ کے بعد آصف علی پابندی سے بچ گئے ہیں تاہم ان پر صرف میچ فیس کا جرمانہ طے ہوا ہے۔

ذرائع کے مطابق پاکستانی بلے باز آصف علی اور افغان بولر فرید احمد میچ ریفری کے سامنے پیش ہوئے جب کہ دونوں کھلاڑیوں پر لیول ون کی خلاف ورزی ثابت ہوئی ہے۔

ذرائع کا کہنا ہے کہ آصف علی کل سری لنکا کے خلاف میچ کے لئے کلیئر قرار دے دیے گئے ہیں، آصف علی پر صرف میچ فیس کا جرمانہ طے ہوا ہے جب کہ آئی سی سی آئندہ 24 گھنٹوں میں جرمانے کا اعلان کرے گا۔

واضح رہے کہ گذشتہ روز پاکستان اور افغانستان کی ٹیموں کے درمیان ایشیاکپ سپر فور مرحلے کا میچ کھیلا گیا تھا جس میں پاکستان نے سنسنی خیز مقابلے کے بعد ایک وکٹ سے کامیابی حاصل کی تھی۔

میچ کے دوران آصف علی اور افغان بولر فرید احمد کے درمیان تلخ جملوں کا تبادلہ ہوا تھا، افغان بولر نے آصف علی کو آؤٹ کرنے کے بعد غیر شائستہ زبان استعمال کرتے ہوئے نازیبا اشارے کیے تھے۔

ردعمل میں آصف علی نے افغان بولر پر اپنا بلا اٹھایا تھا جب کہ اس دوران دونوں کھلاڑی بھی آمنے سامنے آگئے تھے۔

یاد رہے کہ پاکستان سے شکست کے بعد افغانستان کرکٹ ٹیم ایشیاکپ 2022 سے باہر ہوگئی ہے۔