بنگلادیش کے سابق کپتان مشفیق الرحیم نے ایشیاکپ میں خراب پرفارمنس کے بعد ٹی ٹوئٹنی انٹرنیشنل کرکٹ سے ریٹائرمنٹ کا اعلان کردیا ہے۔

بنگلادیش کے 35 سالہ سابق کپتان مشفیق الرحیم کا سوشل میڈیا پر بیان جاری کرتے ہوئے کہنا تھا کہ ’میں آج ٹی ٹوئنٹی انٹرنیشنل کرکٹ سے ریٹائرمنٹ کا اعلان کرتا ہوں‘۔

انہوں نے کہا کہ ’میں فخر کے ساتھ ٹیسٹ اور ون ڈے فارمیٹس میں بنگلا دیش کی نمائندگی کرتا رہوں گا، مجھے امید ہے کہ میں ان دونوں فارمیٹس میں اپنی قوم کو کامیابیاں دلواسکوں گا‘۔

ان کا مزید کہنا تھا کہ ’میں بنگلادیش پریمیئر لیگ اور دیگر ٹی ٹوئنٹی لیگز میں حصہ لیتا رہوں گا‘۔

واضح رہے کہ مشفیق الرحیم کا یہ اعلان متحدہ عرب امارات میں ہونے والے ایشیا کپ میں افغانستان اور سری لنکا کے خلاف بنگلادیش کی شکست کے بعد سامنے آیا ہے۔

ان میچز میں انہوں نے صرف پانچ رنز ہی اسکور کیے تھے جب کہ ایشیا کپ سے قبل انہیں ویسٹ انڈیز اور زمبابوے کے خلاف سیریز میں ڈراپ کردیا گیا تھا۔