قومی ٹیم کے نوجوان بیٹر حیدر علی کو اچانک طبیعت خرابی کے بعد اسپتال منتقل کردیا گیا ہے۔

خبر رساں ادارے کے مطابق پاکستان کرکٹ بورڈ (پی سی بی) کی جانب سے جاری اعلامیے میں کہا گیا ہے کہ نوجوان کھلاڑی حیدر علی کی طبیعت اچانک خراب ہوگئی ہے جس کے بعد انہیں اسپتال منتقل کیا گیا ہے۔

پی سی بی کے مطابق حیدر علی آج رات اسپتال میں ہی گزاریں گے جہاں ان کا مکمل چیک اپ کیا جائے گا۔

پی سی بی کا یہ بھی کہنا تھا کہ قومی ٹیم آج ہوٹل میں آرام کرے گی اور کرکٹ کے حوالے سے کوئی سرگرمی نہیں ہوگی۔

واضح رہے کہ حیدر علی آج انگلینڈ کے خلاف ہونے والے چھٹے ٹی ٹوئنٹی میچ میں قومی اسکواڈ کا حصہ تھے جب کہ انہوں نے بیٹنگ کرتے ہوئے 14 گیندوں پر 18 رنز اسکور کیے تھے۔

چھٹے میچ میں قومی ٹیم کو انگلینڈ کے ہاتھوں 8 وکٹوں سے شکست کا سامنا کرنا پڑا ہے جب کہ سیریز میں دونوں ٹیمیں 3-3 میچز جیت کر برابر ہیں۔

ٹی ٹوئنٹی سیریز کا ساتواں اور فیصلہ کن میچ بروز اتوار 2 اکتوبر کر لاہور کے قذافی اسٹیڈیم میں کھیلا جائے گا جو مقامی وقت کے مطابق شام 7:30 بجے شروع ہوگا۔