ٹی ٹوئنٹی ورلڈ کپ میں زمبابوے کے ہاتھوں قومی ٹیم کو بدترین شکست پر شعیب اختر کا سخت ردعمل سامنے آگیا ہے۔

آسٹریلیا میں ٹی ٹوئنٹی ورلڈ کپ کے سپر 12 مرحلے کے میچز جاری ہیں جس میں آج پاکستان کا مقابلہ زمبابوے سے ہوا جب کہ اس میچ میں قومی کھلاڑیوں نے ناقص کارکردگی کا مظاہرہ کیا جس کی وجہ سے پاکستان کو 1 رنز سے شکست کا سامنا کرنا پڑا۔

 زمبابوے کے ہاتھوں پاکستان کی بدترین شکست پر شائقین کرکٹ سمیت سابق کھلاڑی بھی مایوسی کا اظہار کررہے ہیں جب کہ سابق فاسٹ بولر شعیب اختر کا بھی سخت ردعمل سامنے آگیا ہے۔

شعیب اختر کا کہنا تھا کہ میں بہت حیران ہوں، اور سلیکٹ کرو ایوریج لوگ اور ایوریج مینجمنٹ کو تو یہی نتیجہ نکلتا ہے۔ اب آپ زمبابوے جیسی ٹیم سے ہار گئے جس پر میں بہت مایوس ہوں۔

Average mindset, Average results. Thats the reality, face it. pic.twitter.com/plLZ11Qx0Y

Advertisement

— Shoaib Akhtar (@shoaib100mph) October 27, 2022

انہوں نے کہا کہ اب پاکستان کا اگلے مرحلے میں کوالیفائی کرنا بھی بہت مشکل ہوگیا ہے، اب وہی باتیں ہوں گی کہ اگر ایسا ہوجائے ویسا ہوجائے تو ہمارا چانس بنے۔

انہوں نے مزید کہا کہ ’میں دو ماہ پہلے ہی بول چکا ہوں اگر آپ ایوریج ذہنیت والے لوگ منتخب کریں گے تو نتائج بھی ایوریج ہی ملیں گے‘۔

واضح رہے کہ اس میچ میں زمبابوے نے ٹاس جیت کر پہلے بیٹنگ کرنے کا فیصلہ کیا اور پاکستان کو جیت کے لیے 131 رنز کا ہدف دیا جب کہ ہدف کے تعاقب میں قومی بلے باز ناکام رہے اور مقررہ اوورز میں 129 رنز ہی بناسکے۔

خیال رہے کہ زمبابوے نے آئی سی سی ٹی ٹوئنٹی ورلڈکپ میں پاکستانی ٹیم کو پہلی بار کسی بڑے ایونٹ میں سنسنی خیز مقابلے کے بعد ایک رن سے شکست دی ہے جس سے قومی ٹیم کے اگلے مرحلے میں رسائی کے امکانات تقریباً ختم ہوگئے ہیں۔