کیریبین پریمئیر لیگ کے چھٹے ایڈیشن کے فائنل میں جمیکا تلاواہ نے بارباڈوس رائلز کر شکست دے کر تیسری بار ٹائٹل اپنے نام کیا۔

تفصیلات کے مطابق کیریبین پریمیئر لیگ (سی پی ایل) کے چھٹے ایڈیشن میں اگرچہ بارباڈوس رائلز پورے ٹورنامنٹ میں سب سے آگے رہے تھے، لیکن یہ تلاواہ ہی تھے جنہوں نے لیگ میں اپنا تیسرا ٹائٹل اپنے نام کیا۔

برینڈن کنگ کی روانی سے نصف سنچری اور فیبین ایلن اور نکلسن گورڈن کی تین تین وکٹوں کی مدد سے تلاواہ نے فائنل میں ٹائٹل کے فیوریٹ رائلز کو زیر کیا۔

فائنل میں جمیکا تلاواہ اپنے اہم باؤلر محمد عامر کے بغیر اترے، پاکستانی پیسر کمر کی انجری کی وجہ سے فائنل نہ کھیل سکے، عامر پاور پلے میں 9 وکٹوں کے ساتھ لیگ میں سرفہرست تھے۔

عامر کی جگہ مقامی باؤلر گورڈن نے جمیکا تلاواہ میں جگہ بنائی جنہوں نے 33 رنز کے عوض تین اہم وکٹیں حاصل کی۔

بائیں ہاتھ کے فنگر اسپنر ایلن نے بھی تین اہم وکٹیں حاصل کیں، پاور پلے کی آخری گیند پر ایلن نے اوپنر رحمان کارن ویل کو واپس بھیج دیا، ایلن نے تھوڑی دیر بعد میئرز بھی کو آؤٹ کر دیا۔

ایلن نے اعظم خان کی وکٹ بھی حاصل کی، جو رائلز کے لیے 40 گیندوں پر 51 رنز بنا کر ٹاپ اسکورر تھے۔

پاکستانی لیفٹ آرم اسپنر عماد وسیم نے بھی پہلی اننگز میں رنز کے بہاؤ کو روکنے میں اہم کردار ادا کیا اور یہاں تک کہ جیسن ہولڈر کی اہم وکٹ بھی حاصل کی، جو 17 (19) کے اسکور پر آؤٹ ہوئے۔

بارباڈوس رائلز نے دوسری اننگز میں تعاقب کرنے کے لیے تلاواہ کو 162 کا ہدف دیا۔

جمیکا تلاواہ کے اوپنر کینر لیوس کے صفر پر آؤٹ ہونے کے بعد بروکس اور کنگ کے درمیان 84 رنز کی شراکت نے کھیل کا رخ ان کے حق میں کر دیا۔

کنگ کے 50 گیندوں پر ناقابل شکست 83 رنز شاندار تھے، 17ویں اوور کی پہلی گیند پر کنگ کے چھکے نے جمیکا تلاواہ کے کیمپ میں جشن کی تیاری کا اعلان کیا۔