قومی ٹیم کے کپتان بابر اعظم انگلینڈ کے خلاف ٹیسٹ سیریز جیتنے کے لیے پرامید ہیں جب کہ انہوں نے اپنی نظریں ٹیسٹ چیمپئن شپ پر جمالیں ہیں۔

پاکستان کرکٹ ٹیم کے کپتان بابر اعظم کا میڈیا سے گفتگو کرتے ہوئے کہنا تھا کہ ٹیسٹ اسکواڈ فائنل ہوگیا ہے جس کا اعلان شام یا کل تک سامنے آجائے گا۔

انہوں نے کہا کہ انگلینڈ کا اسکواڈ سامنے آنے کے بعد اپنا پلان تیار کرلیا ہے، کل میدان میں اپنا لائحہ عمل سامنے لائیں گے۔

ان کا کہنا تھا کہ تمام کھلاڑیوں نے تیاری کرلی ہے، انگلینڈ کے خلاف پہلے فاسٹ بولر اور پھر اسپنرز کو سامنے لائیں گے، سینئر کھلاڑی محمد یوسف کافی تجربہ کار ہیں جن سے بھرپور رہنمائی مل رہی ہے۔

قومی ٹیم کے کپتان کہتے ہیں راولپنڈی کی کنڈیشنز دونوں ٹیموں کو سپورٹ کرتی ہیں، کوشش ہوگی کہ پہلے میچ میں کامیابی سمیٹ کر سیریز میں فاتحانہ آغاز کریں۔

بابر اعظم نے کہا کہ ٹیسٹ میچز میں ایک سیشن میچ کو بدل سکتا ہے جب کہ ہمارے فاسٹ بولرز اور اسپنرز میچ جتوانے کی صلاحیت رکھتے ہیں۔

انہوں نے مزید کہا کہ ٹی ٹوئنٹی فارمیٹ سے ٹیسٹ میں آنا مشکل ہوتا ہے لیکن تینوں فارمیٹ میں ملکی کی نمائندگی کرنا میرے لیے فخر کی بات ہے۔