قومی کرکٹ ٹیم کے فاسٹ بولر حارث رؤف نے بتادیا ہے کہ وہ کن خوبیوں کی مالک لڑکی کو اپنی شریکِ حیات بنانا چاہتے ہیں۔

ان دنوں آسٹریلیا میں ٹی ٹوئنٹی ورلڈ کپ جاری ہے جس میں پاکستان نے فائنل تک رسائی حاصل کرلی ہے جس کا کریڈٹ پوری ٹیم کو جاتا ہے جن میں حارث رؤف بھی شامل ہیں۔

پاکستان سپر لیگ میں لاہور قلندرز ڈیولپمنٹ پروگرام میں اپنی تیز رفتار بولنگ کے ذریعے دنیا کی توجہ حاصل کرنے والے فاسٹ بولر حارث رؤف نے بہت کم عرصے میں شہرت کمائی اور وہ اپنی صلاحیتوں کی وجہ سے قومی ٹیم میں جگہ بنانے میں کامیاب رہے ہیں۔

فاسٹ بولر کا شمار پاکستان کے سپر اسٹار میں ہوتا ہے، اگر ہم حارث رؤف کے کیریئر کی بات کریں تو ون ڈے میں انہوں نے اب تک 15 میچز میں 29 وکٹیں حاصل کیں ہیں۔

یہ بھی پڑھیں: حارث رؤف اپنی کامیابی کا کریڈٹ کس کو دیتے ہیں؟

اسی طرح ٹی ٹوئنٹی کیریئر میں وہ 56 میچز کھیل کر 70 وکٹیں حاصل کرچکے ہیں جب کہ ڈومیسٹک کرکٹ میں ایک مرتبہ پانچ وکٹیں لینے کا اعزاز بھی حاصل کیا ہے۔

حال ہی میں ایک نجی ٹی وی کو انٹرویو دیتے ہوئے حارث رؤف نے انکشاف کیا تھا کہ وہ اپنی اہلیہ میں کیا خوبیاں دیکھنا چاہتے ہیں۔

پروگرام کے میزبان سہیل وڑائچ نے ان سے مزاحیہ انداز میں شادی کا سوال پوچھا جس کے جواب میں انہوں نے کہا کہ میں ایسی لڑکی سے شادی کرنا چاہتا ہوں جسے کرکٹ میں بالکل بھی دلچسپی نہ ہو۔

انہوں نے کہا کہ کرکٹ کی بات صرف مجھ پر چھوڑ دی جائے اور لڑکی جو بھی ہو وہ صرف میرا خیال رکھے۔

حارث رؤف نے بات کو آگے بڑھاتے ہوئے کہا تھا کہ ’میں پسند کی شادی کرنا چاہتا ہوں لیکن میں پسند کی شادی اس طرح کروں گا کہ یہ طے شدہ شادی میں بدل جائے‘۔

واضح رہے کہ اس سے قبل حارث رؤف نے پاکستان کی نامور اداکارہ مایا علی کے ساتھ ڈنر کی خواہش کا اظہار کیا تھا۔