سابق بھارتی کھلاڑی وریندر سہواگ پاکستان کے نوجوان وکٹ کیپر و بیٹر محمد حارث کی صلاحیتوں کے معترف ہوگئے ہیں۔

پاکستان کے ابھرتے ہوئے وکٹ کیپر و بیٹر محمد حارث نے جمعرات کو سڈنی کرکٹ گراؤنڈ میں جنوبی افریقہ کے خلاف جارحانہ بلے بازی کا مظاہرہ کرکے دنیا کو حیران کردیا ہے۔

انہوں نے تین چھکوں اور دو چوکوں کی مدد سے 11 گیندوں پر 28 رنز اسکور کیے اور پاکستان کو شاندار آغاز فراہم کیا تھا۔

سابق بھارتی بلے باز وریندر سہواگ کا محمد حارث کی تعریف کرتے ہوئے کہنا تھا کہ محمد حارث ، بابر اعظم اور رضوان کو نیچے دھکیلتے ہوئے پہلی پوزیشن پر قبضہ کرسکتے ہیں۔

انہوں نے کہا کہ ’جس طرح حارث نے بیٹنگ کی اس کو دیکھتے ہوئے ان کا مستقبل روشن ہے ، انہوں نے آسٹریلیا جیسی پچز پر جنوبی افریقہ کا مقابلہ کیا‘۔

وریندر سہواگ کہتے ہیں انہوں نے شاید 28 رنز بنائے لیکن وہ 60 سے کم نہیں تھے، اگر وہ اسی طرح کھیلتے رہے تو رضوان اور بابر کو بیٹنگ آرڈر میں نیچے جانے پر مجبور کرسکتے ہیں۔

واضح رہے کہ محمد حارث نے تین چھکے لگانے کے بعد اپنا نام پاور پلے میں تین چھکے لگانے والے پاکستان کے محدود بلے بازوں کی فہرست میں شامل کرلیا ہے۔

اس فہرہست میں عمران نذیر اور حیدر علی شامل ہیں جو پہلے چھ اوورز میں تین چھکے لگا چکے ہیں۔

واضح رہے کہ  پاکستان نے شاداب خان، افتخار احمد اور شاہین آفریدی کی شاندار کارکردگی کے باعث جنوبی افریقہ کو ڈی ایل ایس میتھڈ کے تحت 33 رنز سے شکست دی تھی۔