سابق کپتان جاوید میانداد کہتے ہیں کہ کھلاڑی نہیں جانتا کہ اس کا کیریئر کب ختم ہوجائے جس کی وجہ سے میچ فکسنگ ہوتی ہے۔

نجی خبر رساں ادارے سے گفتگو کرتے ہوئے قومی ٹیم کے سابق کپتان اور کوچ جاوید میانداد کہتے ہیں کہ ہم تو کاؤنٹی کرکٹ کھیلا کرتے تھے اور مجھے کئی طرف سے کھیلنے کی پیشکش ہوئی تھی۔

سابق کپتان نے کہا کہ اگر کوئی کھلاڑی پرفارم نہیں کرتا تو اسے ٹیم سے باہر کردیا جاتا ہے تو اس کا کیا مستقبل ہے، یہی وجہ ہے کہ فکسنگ ہوتی ہے کیونکہ کھلاڑی نہیں جانتا کہ اس کا کیریئر کب ختم ہوجائے۔

جاوید میانداد کا غیر ملکی کوچز کو تنقید کا نشانہ بناتے ہوئے کہنا تھا کہ ’پاکستان کے لیے غیر ملکی کوچز پر انحصار مہنگا پڑ رہا ہے۔

ان کا کہنا تھا کہ گذشتہ کچھ عرصے میں پاکستان ٹیم کے لیے غیر ملکی کوچز پر انحصار مہنگا پڑ رہا ہے، ان کو یہاں اسٹوڈیو میں بلائیں ہم سوال پوچھیں گے کہ وہ کرکٹ کے بارے میں کتنا جانتے ہیں۔

انہوں نے مزید کہا کہ پی سی بی غیر ملکی کوچز کی تقرری کرکے اپنا دامن پچانے کی کوشش کرتا ہے۔