بھارت کو بنگلادیش کے ہاتھوں ون ڈے سیریز میں شکست کا سامنا کرنا پڑا ہے۔

بھارت کو ون ڈے سیریز کے دوسرے میچ میں بھی بنگلادیش سے چار رنز سے شکست ہوگئی ہے جب کہ سیریز بنگلادیش نے 0-2 سے اپنے نام کرلی ہے۔

اس میچ میں بھارتی کپتان روہت شرما اور دیپک چہار زخمی ہوگئے تھے، میچ کے دوسرے اوور میں گیند انگوٹھے پر لگنے کی وجہ سے روہت شرما زخمی ہوئے جب کہ دیپک چہار بھی ان فٹ دکھائی دیے اور صرف تین اوورز ہی کراسکے۔

          علاوہ ازیں بھارتی ٹیم ٹی ٹوئنٹی ورلڈ کپ میں جسپریت بمراہ اور رویندر جدیجا کے ان فٹ ہونے کی وجہ سے ان کے بغیر ہی اتری تھی۔

بنگلادیش کے خلاف دوسرے ون ڈے میں شکست کے بعد بھارتی کپتان روہت شرما کہتے ہیں کہ ’کھلاڑیوں کو اپنا سو فیصد دینے کی ضرورت ہے، یقینی طور پر ہماری ٹیم میں چوٹ تشویش کا موضوع ہے۔

انہوں نے کہا کہ اس معاملے کی تہہ تک جانے کی ضرورت ہے، ہوسکتا ہے کہ بہت زیادہ کرکٹ کھیلنے کی وجہ سے ایسا ہورہا ہو۔

ان کا کہنا تھا کہ ہمیں ایسے کھلاڑیوں پر نظر رکھنے کی ضرورت ہے کیونکہ انہیں یہ سمجھنے کی ضرروت ہے کہ اگر وہ بھارت کے لیے کھیل رہے ہیں تو انہیں اپنا سو فیصد دینا ہوگا۔

انہوں نے مزید کہا کہ ہمیں این سی اے کے ساتھ میٹنگ کرکے کھلاڑیوں کے ورک لوڈ پر نظر رکھنی ہوگی، ہم آدھے ادھورے کھلاڑیوں کو ملک کی نمائندگی کے لیے نہیں رکھ سکتے۔

واضح رہے کہ روہے شرما، دیپک چہار اور کلدیپ سنگھ بنگلادیش کے خلاف تیسرا ون ڈے نہیں کھیل سکیں گے جب کہ روہت شرما کا ٹیسٹ کھیلنا بھی مشکل دکھائی دے رہا ہے کیونکہ وہ ڈاکٹرز سے مشورے کے لیے ممبئی جارہے ہیں۔