پاکستان کرکٹ بورڈ نے نیوزی لینڈ کرکٹ ٹیم کے دورہ پاکستان کے شیڈول کا اعلان کردیا ہے جو 26 دسمبر سے شروع ہوگا۔

پاکستان کرکٹ بورڈ کا ایک بیان میں کہنا ہے کہ دو ٹیسٹ اور تین ون ڈے میچز پر مشتمل سیریز کے شیڈول کا اعلان نیوزی لینڈ کرکٹ (این زیڈ سی) سے مشاورت کے بعد کیا گیا ہے۔

https://twitter.com/TheRealPCB/status/1602635423171371009?t=7VKcbE4ZR4ekz_bLBTCr7w&s=08

نئے شیڈول کے مطابق دو ٹیسٹ میچز پر مشتمل سیریز کا پہلا ٹیسٹ جو 27 دسمبر سے شروع ہونا تھا، اب 26 دسمبر سے نیشنل بینک کرکٹ ایرینا کراچی میں شروع ہوگا۔

دوسرا ٹیسٹ 3 جنوری سے ملتان میں کھیلا جائے گا جب کہ تین ون ڈے میچز پر مشتمل سیریز 10 جنوری سے شروع ہوگی جس کا دوسرا میچ 12 اور تیسرا 14 جنوری کو کراچی میں کھیلا جائے گا۔

واضح رہے کہ اس سے قبل نیوزی لینڈ کرکٹ ٹیم نے دو مرتبہ پاکستان کا دورہ کرنا تھا، پہلے ٹیسٹ سیریز کے لیے دسمبر اور پھر اپریل 2023 میں محدود اوور کی سیریز کے لیے۔

تاہم اب دونوں بورڈز نے دسمبر اور جنوری 2023 میں دو ٹیسٹ اور تین ون ڈے میچز کھیلنے پر اتفاق کیا ہے جب کہ ٹی ٹوئنٹی میچز اگلے سال اپریل میں ہی کھیلے جائیں گے۔

یاد رہے کہ نیوزی لینڈ کرکٹ ٹیم سیکیورٹی خدشات کی بنا پر سیریز ترک کرنے کے ایک سال سے زائد عرصے کے بعد واپس پاکستان آرہی ہے۔

انہوں نے گزشتہ سال ستمبر میں پہلے ون ڈے کے آغاز سے چند منٹ قبل اچانک ہی دستبرداری کا اعلان کیا تھا۔