بابر اعظم ورلڈ ٹیسٹ چیمپئن شپ میں زیادہ رنز بنانے والے ٹاپ تھری بلے بازوں میں شامل ہوگئے ہیں۔

قومی ٹیم کے آل فارمیٹ کپتان بابر اعظم آسٹریلوی بلے باز لبوشین کو پیچھے چھوڑتے ہوئے ورلڈ ٹیسٹ چیمپئن شپ کے ٹاپ تھری بلے بازوں میں شامل ہوگئے ہیں۔

انہوں نے انگلینڈ کے خلاف دوسرے ٹیسٹ کی پہلی اننگز میں 95 گیندوں پر 75 رنز بنائے جس کے بعد ورلڈ ٹیسٹ چیمپئن شپ کے ٹاپ تھری بلے بازوں کی فہرست میں اب ان کا تیسرا نمبر ہے۔

بابر اعظم نے اب تک 11 میچز کی 19 اننگز میں 64.88 کی اوسط سے 1168 رنز بنائے ہیں جس میں ان کی 3 سنچریاں اور 8 نصف سنچریاں شامل ہیں۔

ورلڈ ٹیسٹ چیمپئن شپ کے ٹاپ تھری بلے بازوں کی فہرست میں پہلا نمبر برطانوی بلے باز جوئے روٹ کا ہے، انہوں نے 21 میچز کی 39 اننگز میں 54.71 کی اوسط سے 1915 رنز اسکور کیے ہیں جس میں 8 سنچریاں اور 6 نصف سنچریاں شامل ہیں۔

علاوہ ازیں فہرست میں دوسرا نمبر برطانوی بلے باز جونی بیرسٹو کا ہے جو اب تک 15 میچز کی 38 اننگز میں 6 سنچریوں اور 8 نصف سنچریوں کی بدولت 55.70 کی اوسط سے 1894 رنز اسکور کرچکے ہیں۔

چوتھے نمبر پر جانے والے مارنس لبوشین 12 میچز کی 21 اننگز کھیل کر 60.84 کی اوسط سے 5 سنچریوں اور 3 نصف سنچریوں کی مدد سے 1156 رنز بنا چکے ہیں۔

پانچویں نمبر پر آسٹریلیا ہے کی عثمان خواجہ ہیں جنہوں نے 9 میچز کی 17 اننگز میں 82 کی اوسط سے 1066 رنز بنائے ہیں جس میں ان کی 4 سنچریاں اور 5 نصف سنچریاں شامل ہیں۔

واضح رہے کہ قومی ٹیم کے کپتان بابر اعظم اس وقت تمام فارمیٹس میں سب سے زیادہ رنز بنانے والے کھلاڑی ہیں، انہوں نے سال 2022 میں 46 اننگز کھیل کر 52.73 کی اوسط سے 2215 رنز بنائے ہیں جس میں 7 سنچریاں اور 14 نصف سنچریاں شامل ہیں۔

بابر اعظم کا بلے بازوں کی ون ڈے رینکنگ میں پہلا، ٹیسٹ میں تیسرا اور ٹی ٹوئنٹی میں چوتھا نمبر ہے۔