پاکستان ٹیم اس وقت نیوزی لینڈ کے خلاف ٹیسٹ سیریز میں اپنے بہترین بولرز کے بغیر کھیل رہی ہے۔

تفصیلات کے مطابق قومی ٹیم کے فاسٹ بولر شاہین آفریدی، نسیم شاہ اور حارث رؤف انجری کے باعث ٹیم سے باہر ہیں۔

شاہین آفریدی پہلے ہی اپنی گھٹنے کی انجری سے صحتیاب ہورہے تھے جب کہ نسیم شاہ اور حارث رؤف بھی انگلینڈ کے خلاف پہلا ٹیسٹ کھیلنے کے بعد ٹیم سے باہر ہوگئے۔

ٹیسٹ سیریز کے بعد پاکستان اور نیوزی لینڈ کی ٹیموں کے درمیان ون ڈے سیریز شیڈول ہے جو 9 جنوری سے کراچی میں شروع ہوگی۔

نیوزی لینڈ کے خلاف ون ڈے سیریز کے لیے کواڈ انجری سے صحتیاب ہونے والے حارث رؤف بھی سلیکشن کے لیے دستیاب ہوں گے۔

حال ہی میں حارث رؤف نے لاہور کے نیشنل ہائی پرفارمنس سینٹر (این ایچ پی سی) میں اپنی تربیت کی ویڈیو پوسٹ کی ہے۔

واضح رہے کہ نیوزی لینڈ کے خلاف ون ڈے سیریز کے لیے ابھی ٹیم کا اعلان ہونا باقی ہے۔