ارجنٹینا کے اسٹار فٹ بالر لیونل میسی نے فیفا ورلڈ کپ کے بعد بھی کھیل جاری رکھنے کا اعلان کردیا ہے۔

غیر ملکی خبر رساں ادارے کے مطابق 35 سالہ لیونل میسی نے فیفا ورلڈ کپ جیتنے کے بعد بھی اپنے ملک کے لیے کھیل جاری رکھنے اور ریٹائرمنٹ نہ لینے کا اعلان کیا ہے۔

رپورٹ کے مطابق لیونل میسی فٹ بال ورلڈ کپ کے فوری بعد ریٹائر نہیں ہوں گے جب کہ وہ مزید کچھ وقت کے لیے اپنے ملک کی نمائندگی کرنا چاہتے ہیں۔

اس حوالے سے لیونل میسی کا کہنا ہے کہ ’میری خواہش ہے کہ ایک چیمپئن کھلاڑی کے طور پر ابھی چند مزید میچز میں ارجنٹائن کی نمائندگی کرنے کا اعزاز پاؤں‘۔

انہوں نے کہا کہ ’میں خوش قسمت ہوں کہ اپنے کیریئر میں ہر ٹائٹل کا حصہ بنا ہوں، صرف ورلڈ کپ ٹرافی نہیں تھی جو اب حاصل کرلی ہے‘۔

واضح رہے کہ ارجنٹینا 36 سال بعد فٹ بال ورلڈ کپ کی ٹرافی حاصل کرنے میں کامیاب رہی ہے جب کہ انہیں عالمی چیمپئن بنوانے میں میسی کا خاص کردار رہا ہے۔

اس سے قبل میسی نے فیفا ورلڈ کپ 2022 کے بعد ریٹائرمنٹ کا اعلان کیا تھا تاہم ابھی یہ واضح نہیں ہے کہ وہ مسلسل کھیلتے رہیں گے یا مختصر وقت کے لیے کھیلیں گے۔