مسٹری اسپنر ابرار احمد کے والد انور اسلام کہتے ہیں کہ آج ہماری زندگی کا دوسرا خوشی کا دن ہے۔

قومی ٹیم کے نوجوان مسٹری اسپنر ابرار احمد نے گذشتہ روز ملتان ٹیسٹ میں اپنا ڈیبیو کیا اور انگلینڈ کی ٹیم کے چھکے چھڑا دیے۔

انہوں نے کھیل کے پہلے دن کھانے کے وقفے سے قبل ہی انگلینڈ کی آدھی ٹیم کو پویلین بھیج دیا تھا جب کہ مجموعی طور پر انہوں نے اننگز میں 7 وکٹیں حاصل کی۔

انگلینڈ کے خلاف 7 وکٹیں حاصل کرنے پر ابرار احمد کے گھر والے بھی خوشی سے نہال ہیں جب کہ ان کے والد نے بیٹے کی شاندار کارکردگی سے قوم کا سر فخر سے بلند کرنے پر خوشی کا اظہار کیا ہے۔

ابرار احمد کے والد کا میڈیا سے گفتگو کرتے ہوئے کہنا تھا کہ ’یہ ان کے لیے دوسرا خوشی کا لمحہ تھا جب کہ ان کی زندگی کا سب سے خوشگوار لمحہ وہ تھا جب ابرار احمد نے قرآن پاک حفظ کیا تھا‘۔

انہوں نے کہا کہ آج ہم بہت خوش ہیں، ابرار نے ملتان ٹیسٹ میں انگلینڈ کے خلاف اپنے ڈیبیو پر سات وکٹیں حاصل کی ہیں۔

ابرار احمد کے بھائی امجد احمد کہتے ہیں ’ان کی ڈومیسٹک کارکردگی نے مجھے ان کی خوبیوں کا احساس دلایا جب کہ مجھے یقین تھا کہ ایک دن وہ پاکستان کے لیے ضرور کھیلے گا‘۔

واضح رہے کہ انگلینڈ کے خلاف 7 وکٹیں حاصل کرکے ابرار احمد ڈیبیو ٹیسٹ میں 5 وکٹیں لینے والے 13 ویں اور 7 وکٹیں لینے والے تیسرے پاکستانی بولر بن گئے ہیں۔