پاکستان کے سابق فاسٹ بولر عاقب جاوید کا خیال ہے کہ رمیز راجہ اکیلے ہی پاکستان کرکٹ بورڈ (پی سی بی) کی ذمہ داریاں نبھا رہے تھے۔

حال ہی میں وزیر اعظم شہباز شریف کی منظوری کے بعد رمیز راجہ کی جگہ نجم سیٹھی کو پی سی بی کی مینجمنٹ کمیٹی کا چیئرمین بنادیا گیا۔

اس حوالے سے پاکستان کے سابق فاسٹ بولر عاقب جاوید کا کہنا ہے کہ ’رمیز راجہ پی سی بی میں ون مین شو تھے جس کا انہوں نے خود اعتراف کیا ہے‘۔

عاقب جاوید کہتے ہیں ’رمیز راجہ کو پاکستان کرکٹ کی بہتری کے لیے کام کرنے کا موقع دیا گیا لہذا اب نجم سیٹھی کو بھی کام کرنے دیا جائے‘۔

انہوں نے کہا کہ میں نے رمیز راجہ کو مشورہ دیا تھا کہ وہ اپنے عہدے سے مستعفی ہو جائیں اور نئی آنے والی حکومت کو پاکستان کرکٹ بورڈ (پی سی بی) کا نیا چیئرمین لانے دیں لیکن انہوں نے میری بات نہیں مانی۔

پاکستان کے سابق فاسٹ بولر نے کہا کہ نجم سیٹھی کو پاکستان کرکٹ بورڈ (پی سی بی) کی مینجمنٹ کمیٹی کا چیئرمین بنانے کا فیصلہ بہت اچھا ثابت ہورہا ہے۔

انہوں نے مزید کہا کہ پی سی بی میں رمیز راجہ کی چیئرمین شپ کے دوران پی ایس ایل فرنچائزز سمیت تقریباً ہر کوئیا ان سے ناراض تھا۔

واضح رہے کہ اس سے قبل ایک بیان میں رمیز راجہ کا کہنا تھا کہ نجم سیٹھی کو پاکستان میں کوئی دلچسپی نہیں اور وہ صرف اختیار چاہتے ہیں۔

رمیز راجہ نے کہا کہ نجم سیٹھی کو نہیں معلوم کہ انہیں پی سی بی میں کتنے ماہ رہنا ہے جب کہ انہیں پاکستان کرکٹ میں بھی کوئی دلچسپی نہیں ہے۔

انہوں نے بتایا کہ نجم سیٹھی نے پی سی بی ہیڈ کوارٹر پر ایف آئی اے کے چھاپے کی طرح  حملہ کیا جس کی وجہ سے میں اپنے دفتر سے سامان تک نہیں لے اٹھا سکا۔