پاکستان کرکٹ بورڈ (پی سی بی) کی مینجمنٹ کمیٹی کے چیئرمین نجم سیٹھی کا کہنا ہے کہ اگر سابق کرکٹر محمد عامر انٹرنیشنل کرکٹ میں واپسی کرنا چاہتے ہیں تو انہیں نہیں روکیں گے۔

نجم سیٹھی نے پیر کو عرب نیوز کو انٹرویو دیتے ہوئے کہا کہ ’اگر محمد عامر دوبارہ پاکستان سے کھیلنے کے لیے دستیاب ہونا چاہتے ہیں تو میں انہیں نہیں روکوں گا‘۔

پی سی بی کے نومنتخب چیئرمین نے کہا کہ وہ محمد عامر کی قومی ٹیم میں واپسی کی حمایت کرتے ہیں۔

انہوں نے کہا کہ ایک کھلاڑی جس نے اپنے جرم کا اعتراف کیا اور آئی سی سی کو میچ فکسنگ سمیت بدعنوانی روکنے میں مدد کی اور پھر کرکٹ سے باہر ہونے کی وجہ سے پانچ سال کی سزا کاٹی، وہ واپس آنے کا مستحق ہے۔

ان کا کہنا تھا کہ ’محمد عامر کا خیال ہے کہ پی سی بی کی سابقہ انتظامیہ بشمول سلیکشن کمیٹی اور چیئرمین رمیز راجہ نے ان کے ساتھ منصفانہ سلوک نہیں کیا ہے‘۔

نجم سیٹھی کہتے ہیں کہ پی سی بی کی سابقہ انتظامیہ کے ساتھ اختلافات کی وجہ سے محمد عامر نے خود کو انتخاب کے لیے دستیاب نہیں کیا۔

انہوں نے مزید کہا کہ ’رمیز راجہ کے خیال میں جس نے بھی کرکٹ میں بدعنوانی کی ہے اسے دوبارہ کبھی پاکستان کے لیے کھیلنے کی اجازت نہیں ہونی چاہیے لیکن یہ میرا خیال نہیں ہے! میرا ماننا ہے کہ جس نے جرمانہ ادا کیا ہو اسے پاکستان کے لیے واپسی کی اجازت ہونی چاہیے‘۔

واضح رہے کہ پی سی بی کے سابق چیئرمین رمیز راجہ کی برطرفی کے بعد فاسٹ بولر محمد عامر کی واپسی کی خبریں پھر سے منظر عام پر آرہی ہیں۔

محمد عامر نے 2020 میں مخالف ماحول اور ذہنی اذیت کو وجہ قرار دیتے ہوئے بین الاقوامی کرکٹ سے ریٹائرمنٹ کا اعلان کیا تھا۔