سابق کپتان انضمام الحق کا کہنا ہے کہ اگر نئی مینجمنٹ نے موقع دیا تو پاکستان کی خدمت کے لیے تیار ہوں۔

لاہور میں ایک تقریب کے دوران سابق کپتان انضمام الحق  کا میڈیا سے گفتگو کرتے ہوئے کہنا تھا کہ سب کرکٹرز پاکستان کی خدمت کے لیے تیار رہتے ہیں، اگر نئی مینجمنٹ نے موقع دیا  تو پھر دیکھوں گا۔

انضمام الحق نے کہا کہ کپتانی مشکل چیز ہے یہ کرنے اور سیکھنے سے آتی ہے۔ بابر اعظم پر اگر کوئی دباؤ ہوتا تو اس سے ان کی انفرادی کارکردگی پر فرق پڑتا۔

مزید پڑھیں: ٹیسٹ رینکنگ: بابر اعظم کی تنزلی، شاہین کی پوزیشن برقرار

انہوں نے کہا کہ  ہوم سیریز کے دوران پچز کی مجھے سمجھ نہیں آئی، پچز بنانے والوں کو ضرور پوچھنا چاہیے۔

سابق کپتان کا کہنا تھا کہ مجھے سیریز کے دوران اب تک سلیکشن کی بھی سمجھ نہیں آئی تھی۔ پاکستان ٹیم میں بہت زیادہ آل راؤنڈرز کو شامل کر لیا گیا تھا۔

انضمام الحق نے کہا کہ  کوچ کی حیثیت سے فیور دینے نہ دینے کی بات درست نہیں ہے، ضروری نہیں ہے کہ یہاں کے کوچز فیور دیتے ہیں۔

مزید پڑھیں: شاہد آفریدی نے ٹی ٹوئنٹی سلیکشن کے لیے نیا معیار مقرر کردیا

انہوں نے کہا کہ ہمارے ملکی کوچز باصلاحیت ہیں انہوں نے اچھے نتائج دیے ہوئے ہیں۔  ریزلٹ اوپر نیچے ہوتے ہیں، ثقلین مشتاق اور محمد یوسف نے اچھا کام کیا ہے۔

سابق کپتان نے کہا کہ محمد عامر کو اپنی فٹنس کا خود اندازہ ہو گا۔ اگر کسی بھی کھلاڑی کی فارم اور فٹنس اچھی ہے تو اسے موقع ملنا چاہیے۔