نیوزی لینڈ کے خلاف دو ٹیسٹ میچز کی سیریز کے دوسرے اور آخری ٹیسٹ کے لیے پاکستانی اسکواڈ میں تین نئے کھلاڑیوں کو شامل کیا گیا ہے۔

تفصیلات کے مطابق پی سی بی کی عبوری سلیکشن کمیٹی نے نیوزی لینڈ کے خلاف دوسرے ٹیسٹ کے لیے اسکواڈ میں تین نوجوان کھلاڑیوں کو اسکواڈ کا حصہ بنایا ہے۔

شاہد آفریدی کی سربراہی میں عبوری سلیکشن کمیٹی اس بات کو یقینی بنانے کے لیے پرعزم ہے کہ نوجوانوں کو بین الاقوامی کرکٹ سے روشناس کرایا جائے۔

اسی مناسبت سے عبوری سلیکشن کمیٹی نے نوجوانوں کے ایک اور بیچ کو کراچی میں نیوزی لینڈ کے خلاف دوسرے ٹیسٹ کے دوران پاکستانی ٹیسٹ اسکواڈ کے ساتھ ڈریسنگ روم میں شرکت کے لیے مدعو کیا ہے۔

بلے باز حسیب اللہ، صائم ایوب اور فاسٹ بولر احسان اللہ کو دوسرے ٹیسٹ کے دوران کھلاڑیوں کے ساتھ ڈگ آؤٹ شیئر کرنے کے لیے بلایا گیا ہے۔ پہلے ٹیسٹ میں سلیکٹرز نے باسط علی، عرفات منہاس اور محمد ذیشان کو بھی اس کے لیے مدعو کیا تھا۔

یہ دونوں نوجوان بلے باز پاکستان کپ میں سب سے زیادہ رنز بنانے والے کھلاڑی ہیں۔ حسیب اللہ نے بلوچستان کے لیے 10 اننگز میں 50.40 کی اوسط سے 504 رنز بنائے ہیں

سندھ کے لیے صائم ایوب نے 10 اننگز میں 461 رنز بنائے ہیں، اور خیبرپختونخوا کے احسان اللہ نے 10 میچوں میں 24 وکٹیں حاصل کیں۔

تینوں نوجوانوں نے حال ہی میں ختم ہونے والی قائد اعظم ٹرافی میں بھی اچھے کارکردگی کا مظاہرہ کیا تھا۔

عبوری سلیکشن کمیٹی کے سربراہ شاہد آفریدی نے کہا کہ نوجوانوں کے لیے یہ ضروری ہے کہ وہ ٹاپ کھلاڑیوں کے ساتھ ڈریسنگ روم کا اشتراک کریں اور ان کے کھیل سے سیکھیں۔