سعودی کلب کی جانب سے کھیلنے کے لیے اسٹار فٹ بالر کرسٹیانو رونالڈو ریاض پہنچ گئے۔

بین الاقوامی خبر رساں ادارے کے مطابق کرسٹیانو رونالڈو کی فیملی بھی ان کے ہمراہ سعودی عرب پہنچی ہے۔

کرسٹیانو رونالڈو کا النصر کلب کی جانب سے آج میڈیکل ٹیسٹ کیا جائے گا اور سعودی عرب کے مقامی وقت کے مطابق شام 7 بجے ان کے باضابطہ طور پر کلب میں شمولیت کا اعلان کیا جائے گا۔

مزید پڑھیں: فیفا ورلڈ کپ میں رونالڈو کو بنچ پر بٹھانے کی اصل وجہ سامنے آ گئی

پرتگال کے سپر اسٹار فٹ بالر کرسٹیانو رونالڈو نے گزشتہ ماہ سعودی عرب کے النصر فٹ بال کلب سے تاریخی معاہدہ کیا تھا۔

کرسٹیانو رونالڈو نے سعودی عرب کے النصر کلب کے ساتھ نئے سیزن کا معاہدہ کیا ہے جس کے تحت وہ النصر کلب کے ساتھ فٹ بال کے ڈھائی سیزن کھیلیں گے۔

کرسٹیانو  رونالڈو کو معاہدے کے مطابق النصر کلب کے ساتھ دو سو ملین یورو ایک سیزن کے ملیں گے جبکہ اشتہارات کی اضافی رقم بھی ان کے حصے میں آئے گی۔

مزید پڑھیں:فیفا ورلڈ کپ میں شکست کے باوجود رونالڈو نے ایک اور اعزاز اپنے نام کر لیا

واضح رہے کہ کرسٹیانو رونالڈو دنیا بھر میں سب سے زیادہ معاوضہ لینے والے کھلاڑی ہیں۔

عرب میڈیا  کی رپورٹ کے مطابق النصر فٹ بال کلب رونالڈو کو ہر سال ساڑھے 7 کروڑ ڈالرز  ادا کرے گا۔