لاہور: پی سی بی مکی آرتھر کو ’’آن لائن‘‘ ہیڈ کوچ رکھنے پر راضی ہوگیا ہے۔

ذرائع کے مطابق پاکستان کرکٹ بورڈ (پی سی بی) مکی آرتھر کو ’’آن لائن‘‘ ہیڈ کوچ رکھنے پر راضی ہوگیا ہے۔

ذرائع کا کہنا ہے کہ مکی آرتھر اپنی مرضی کی سیریز اور ٹورنامنٹ میں ٹیم کے ساتھ سفر کریں گے اور اگر مکی آرتھر کے ساتھ کنٹریکٹ طے پاجاتا ہے تو وہ اکتوبر میں ان کی پہلی فیلڈ اسائنمنٹ ہوگی۔

مکی آرتھر اپریل میں نیوزی لینڈ کے خلاف ہوم سیریز میں بھی ’آن لائن‘ کوچنگ کریں گے جب کہ ایشیا کپ، دورہ سری لنکا اور شارجہ میں افغانستان کے خلاف سیریز میں بھی ‘‘ آن لائن ‘‘ کوچنگ کریں گے۔

ذرائع نے بتایا کہ اگلے برس 2024 میں امریکہ اور ویسٹ انڈیز میں ہونے والے ورلڈ کپ میں بھی پاکستانی ٹیم کے ہیڈ کوچ ٹیم کے ساتھ نہیں ہوں گے، مکی آرتھر 2024 میں پاکستان ٹیم کے دورہ انگلینڈ، آئرلینڈ اور نیدرلینڈز میں بھی ’آن لائن‘ کوچنگ کریں گے۔

ذرائع نے مزید بتایا کہ پی سی بی مکی آرتھر کے لیے اسسٹنٹ کوچز بھی غیر ملکی رکھے گا، مکی آرتھر ڈربی شائر کاؤنٹی کے ساتھ معاہدہ جاری رکھنا چاہتے ہیں جب کہ پی سی بی زبردستی انہیں ساتھ رکھنے کیلئے کوشاں ہے۔