نجم سیٹھی نے شاہد آفریدی کو چیف سلیکٹر مقرر کرنے کی وجہ بتادی ہے۔

حال ہی میں پی سی بی کی مینجمنٹ کمیٹی کے چیئرمین نجم سیٹھی نے غیر ملکی میڈیا کو انٹرویو دیتے ہوئے شاہد آفریدی کو عبوری چیف سلیکٹر مقرر کرنے کی وجہ بتادی ہے۔

نجم سیٹھی نے کہا کہ ’شاہد آفریدی کو جرات مندانہ فیصلے لینے کے لیے عبوری چیف سلیکٹر کے طور پر مقرر کیا گیا ہے کیونکہ وہی ایک ایسا شخص ہے جو جرات مندانہ فیصلے لے سکتا ہے‘۔

نجم سیٹھی نے شاہد آفریدی کے رویے کی تعریف کرتے ہوئے انہیں ’بولڈ اور خوبصورت‘ کھلاڑی قرار دیا ہے۔

انہوں نے کہا کہ ’شاہد آفریدی نئے ٹیلنٹ کے ساتھ تجربے کرتے ہیں اور وہ جانتے ہیں کہ پرانے کھلاڑیوں میں کون اب بھی سونا ہے‘۔ میرے خیال میں ٹیم میں اس کی ہی کمی تھی جس کی وجہ سے ہمیں پچھلے ٹیسٹ میچز میں لگاتار شکستوں کا سامنا کرنا پڑا ہے۔

نجم سیٹھی کے مطابق شاہد آفریدی پاکستانی عوام کو وہ نتائج دینے کے لیے ’صحیح آدمی‘ ہیں جو وہ دیکھنا چاہتے ہیں۔

یہ بھی پڑھیں: شاہد آفریدی بینچ کی طاقت کو بڑھانے کے لیے دو قومی ٹیمیں بنانے کے خواہش مند

ان کا کہنا تھا جب شاہد آفریدی بورڈ میں تھے تو کچھ تبدیلیاں کرنا چاہتے تھے جب کہ وہ جرات مندانہ اور دلچسپ کرکٹ کھیلنا چاہتے تھے۔

انہوں نے مزید کہا کہ ’ہم جیتنے یا ہارنے کے لیے نہیں کھیل رہے ہیں بلکہ اب ہم کھیل کی حقیقی روح کے ساتھ کھیلنے جارہے ہیں‘۔

واضح رہے کہ دو ہفتے قبل عہدہ سنبھالنے والے نومنتخب چیئرمین نجم سیٹھی نے فوری طور پر سابق اسٹار آل راؤنڈر شاہد آفریدی کو پی سی بی سلیکشن کمیٹی کا چیئرمین مقرر کیا تھا۔