پاکستان سپر لیگ (پی ایس ایل) کے 8 ویں ایڈیشن کی رنگا رنگ افتتاحی تقریب 13 فروری کو ملتان کرکٹ اسٹیڈیم میں ہوگی جب کہ میگا ایونٹ میں دنیا بھر سے اسٹار کھلاڑی شرکت کریں گے۔

پی ایس ایل 8 کی افتتاحی تقریب کے سلسلے میں ملتان ویسٹ مینجمنٹ کمپنی کو اسٹیڈیم کی تزئین و آرائش اور صفائی ستھرائی برقرار رکھنے کی ذمہ داری سونپی گئی ہے۔

ملتان ویسٹ مینجمنٹ کمپنی کے سی ای او شکیل احمد بھٹی نے ہفتے کو سائٹ کا دورہ کیا جس میں انہوں نے کہا کہ افتتاحی تقریب کی میزبانی شہر کے لیے ایک بڑا اعزاز ہے۔

ان کا کہنا تھا کہ اس تقریب کے لیے مثالی انتظامات کیے جائیں گے۔ علاوہ ازیں کھلاڑیوں کی بروقت آمد کے موقع پر پورے شہر کو سجایا جائے گا اور صفائی ستھرائی کی جائے گی۔

واضح رہے کہ ملتان کرکٹ اسٹیڈیم پی ایس ایل کے پانچ میچوں کی میزبانی کرے گا جب کہ ملتان ویسٹ مینجمنٹ کمپنی نے شہر کو خوبصورت بنانے اور صفائی ستھرائی کو برقرار رکھنے کے لیے اقدامات شروع کر دیے ہیں۔