تجربہ کار آل راؤنڈر شعیب ملک نے بی پی ایل 2023 کے دوران ٹی ٹوئنٹی کرکٹ میں نیا سنگِ میل عبور کرلیا ہے۔

قومی ٹیم کے تجربہ کار آل راؤنڈر اور سابق کپتان شعیب ملک 500 ٹی ٹوئنٹی میچز کھیلنے والے پہلے پاکستانی اور دنیا کے تیسرے کھلاڑی بن گئے ہیں۔

شعیب ملک وہ واحد کرکٹر بھی ہیں جنہوں نے 400 سے زیادہ لسٹ اے اور ٹی ٹوئنٹی میچز کھیلے ہیں۔

شعیب ملک نے 500 میچوں کی 464 اننگز میں 12 ہزار 287 رنز بنائے ہیں جس کے بعد وہ ٹی ٹوئنٹی کرکٹ میں دوسرے سب سے زیادہ رنز بنانے والے کھلاڑی بھی ہیں۔ علاوہ ازیں انہوں نے 266 اننگز میں 162 وکٹیں بھی حاصل کیں ہیں۔

خیال رہے کہ ٹی ٹوئنٹی کرکٹ میں کیرون پولارڈ سب سے زیادہ 614 میچز کھیلنے والے کھلاڑی ہیں جب کہ دوسرے نمبر ڈوین براوو نے 556 میچز کھیلے ہیں۔

واضح رہے کہ شعیب ملک ٹیسٹ اور ون ڈے کرکٹ سے ریٹائر ہوچکے ہیں لیکن امید کی جارہی ہے کہ وہ جلد ہی پاکستان کی ٹی ٹوئنٹی ٹیم میں واپسی کریں گے۔