قومی ٹیم کے کھلاڑی شاداب خان کی شادی سابق کرکٹر اور کوچ ثقلین مشتاق کی بیٹی سے ہوئی ہے۔

قومی ٹیم کے کھلاڑی شاداب خان کے ولیمے کی تقریب راولپنڈی میں منعقد ہوئی جس میں قومی ٹیم کے کپتان بابراعظم، سابق کپتان سرفراز احمد، محمد حفیظ، فخر زمان اور حارث رؤف سمیت ساتھی کرکٹرز نے شرکت کی۔

ولیمے کی تقریب کے موقع پر کپتان بابر اعظم نے شاداب خان کو سلامی کا لفافہ پیش کیا جسے دیکھ کر شاداب خان حیران رہ گئے۔

ویڈیو میں دیکھا جاسکتا ہے کہ بابر اعظم شاداب کو لفافہ پیش کرتے ہیں جسے حارث رؤف چھیننے کی کوشش کرتے ہیں لیکن ناکام رہتے ہیں جب کہ لفافہ کھولنے کے بعد شاداب خان حیران رہ جاتے ہیں۔

شاداب خان نے ولیمے کے موقع پر کالے رنگ کا خوبصورت تھری پیس سوٹ زیب تن کیا ہوا ہے جب کہ بابر اعظم اور حارث رؤف بھی دلکش کوٹ پینٹ پہنے ہوئے ہیں۔

واضح رہے کہ شاداب خان کی شادی سابق کرکٹر اور کوچ ثقلین مشتاق کی بیٹی سے ہوئی ہے جب کہ ان کے نکاح کی تقریب 23 جنوری کو منعقد ہوئی تھی۔

نکاح کے موقع پر شاداب خان کا کہنا تھا کہ ’مہربانی کرکے میرے انتخاب، میری اہلیہ اور خاندان کا احترام کریں۔ میری طرف سے آپ سب کے لیے دعائیں اور ڈھیر سارا پیار‘۔

انہوں نے لکھا تھا کہ ’میں اپنے مینٹور ثقی بھائی (ثقلین مشتاق) کے خاندان کا حصہ بن رہا ہوں، جب میں نے کرکٹ کھیلنی شروع کی تب سے میں اپنی نجی زندگی کو علیحدہ رکھنا چاہتا تھا اور میری فیملی نے بھی اسی عمل کو ترجیح دی‘۔

انہوں نے مزید لکھا تھا کہ ’میری اہلیہ بھی چاہتی ہیں کہ ہماری زندگی نجی ہی رہے، وہ اسے پبلک نہیں کرنا چاہتی لہذا آپ سے گزارش ہے کہ ہمارے خاندان کی خواہش کا احترام کریں۔

آخر میں شاداب خان نے یہ بھی لکھا تھا ’البتہ اگر پھر بھی آپ لوگ سلامی بھیجنا چاہیں تو میں آپ کو اپنا اکاؤنٹ نمبر بھیج دوں گا‘۔