پاکستان کے محمد شہزاد نے پرتگال میں ہونے والی پرتگال نیشنل انڈور روئنگ چیمپئن شپ میں دو گولڈ میڈل جیت لیے ہیں۔

تفصیلات کے مطابق محمد شہزاد نے 500 میٹر اور 2 ہزار میٹر ریسز میں گولڈ میڈل جیتے ہیں جب کہ انہوں نے 60 سے 64 برس تک کی ماسٹر کیٹیگری میں حصہ لیا تھا۔

یہ بھی پڑھیں: انٹرنیشنل بیڈمنٹن سیریز 2019:پاکستان کی ماحور شہزاد فاتح

محمد شہزاد کی 500 میٹر ریس کا وقت ایک منٹ 33 سیکنڈ رہا جب کہ 2 ہزار میٹر میں محمد شہزاد کا وقت سات منٹ بیس سیکنڈ رہا۔

ورلڈ روئنگ کی آفیشل ویب سائٹ کے مطابق اس کھیل کا نام ’انڈور روئنگ یا ایرجنگ‘ اس لیے رکھا گیا ہے کیونکہ اس کھیل میں ارگو میٹر جیسے آلات کا استعمال ہوتا ہے جو کہ ایک تربیتی آلہ ہے۔

آج انڈور روئنگ اپنے طور پر ایک مسابقتی کھیل بن گیا ہے جس کے مقابلے پوری دنیا میں منعقد ہوتے ہیں جب کہ سب سے مشہور اور طویل چلنے والا مقابلہ سی آر اے ایس ایچ، بی ایس ہے جو ہر سال امریکی ریاست بوسٹن میں منعقد ہوتا ہے۔

پہلی بار 2018 میں عالمی روئنگ انڈور چیمپئن شپ کانسیپٹ ٹو الیگزینڈریا کے ساتھ مل کر امریکہ میں منعقد ہوئی تھی۔