فٹبال کی دنیا کے سب سے بڑے نام  کرسٹیانو رونالڈو کی بیٹیوں نے عربی زبان سیکھنا شروع کر دی ہے۔

 غیر ملکی میڈیا کی رپورٹس کے مطابق کرسٹیانو رونالڈو سعودی فٹبال کلب ’النصر‘ میں باضابطہ شمولیت کے بعد سے فیملی سمیت سعودی عرب میں وقت گزار رہے ہیں۔

حال ہی میں معروف فٹبالر کرسٹیانو رونالڈو کی اہلیہ جارجینا نے اپنے انسٹاگرام اکاؤنٹ پر اپنی بیٹیوں کی ویڈیو پوسٹ کی ہے جس میں انہیں عربی زبان بولتے ہوئے دیکھا جاسکتا ہے۔

 جارجینا نے ویڈیو کے کیپشن میں لکھا ہے کہ ہماری بیٹیاں عربی زبان میں گانا بھی گاتی ہیں۔

یاد رہے کہ کرسٹیانو رونالڈو پانچ بار بیلن ڈی آر جیتنے والا، چیمپیئنز لیگ کا ٹاپ اسکورر بھی ہے، جس نے پانچ ٹائٹل اکٹھے کیے، اور مانچسٹر یونائیٹڈ، ریئل میڈرڈ اور یووینٹس کے ساتھ سات ڈومیسٹک چیمپئن شپ جیت چکے ہیں۔

کرسٹیانو رونالڈو پرتگال کی جانب سے 118 انٹرنیشنل ریکارڈ گول کر چکے ہیں، انہوں نے یورو 2016 بھی جیتا تھا، رونالڈو اپنے کیرئیر میں 819 گول کر چکے ہیں۔

میڈیا رپورٹس میں دعویٰ کیا گیا ہے کہ پرتگالی اسٹار سعودی کلب کے ساتھ معاہدے سے سالانہ 200 ملین ڈالر تک کما سکتا ہے، جس سے وہ تاریخ کا سب سے زیادہ معاوضہ لینے والا فٹبالر بن جائے گا۔