قطر کے دارالحکومت دوحا میں جاری لیجنڈز لیگ 2023 کے میچ میں ایشیا لائنز نے انڈین مہاراجہ کو 85 رنز سے شکست دے دی۔

تفصیلات کے مطابق لیجنڈز لیگ کے ایلیمنیٹر راؤنڈ میں شاہد آفریدی کی ایشیا لائنز نے گوتم گھمبیر کی انڈین مہاراجہ کو 85 رنز سے شکست دے کر ایونٹ سے باہر کر دیا۔

ایشیا لائنز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 191 رنز بنائے۔

ایشیا لائنز کے محمد حفیظ نے 38، اصغر افغان نے 34 رنز بنائے جبکہ اوپل تھرنگا 50 رنز بنا کر نمایاں رہے۔

انڈین مہاراجہ کی جانب سے اسٹورٹ بنی اور پرگیان اوجھا نے 2،2 وکٹیں حاصل کیں۔

انڈین مہاراجہ نے ہدف کے تعاقب میں 47 کے مجموعی اسکور پر اپنے کپتان سے ہاتھ دھو بیٹھی، گوتم گھمبیر 32 رنز بنا کر پویلین لوٹ گئے۔

انڈین مہاراجہ کے رابن اتھاپا نے 15، محمد کیف نے 14، سریش رائنا 18 اور محمد یوسف 9 رنز بنا سکے۔

انڈین مہاراجہ کی پوری 16.4 اوورز میں 106 رنز بنا کر آؤٹ ہو گئی۔

شاہد خان آفریدی کی ایشیا لائنز میں پاکستانی بولرز چھائے رہے، عبدالرزاق، محمد حفیظ اور سہیل تنویر نے 2،2 کھلاڑیوں کو آؤٹ کیا۔

لیجنڈز لیگ 2023 میں انڈین مہاراجہ نے 5 میچز میں سے صرف ایک میں کامیابی حاصل کی اور 4 مقابلوں میں انہیں شکست کا سامنا کرنا پڑا۔

لیجنڈ لیگ ٹی ٹوئنٹی 2023 کا فائنل 20 مارچ کو ایشیا لائنز اور ورلڈ جائنٹس کے درمیان ویسٹ اینڈ پارک انٹرنیشنل کرکٹ اسٹیڈیم دوحا میں کھیلا جائے گا۔